Ka jingïaid jong ka por bad ka jingwan ki jingkylla bapher-bapher khamtam lei ha ka liang ki kor ki bor jong ka mobile bad internet ki la pynsuk shi kat dei eh ïa ka jingim kaba man la ka sngi jong ki briew. Kane ka long ha ka liang ka thied ka tda, ka sumar-sukher, ka jingkwah ne wad ïa ki jingtip kiba har rukom bad kiwei kiwei kiba lah ban ïoh tang da kaba ñion jong kawei ka shympriah kti. Hynrei haba la than eh ka suk, ka jingma ruh ka ïaid ryngkat-ryngkat. Lada nang ban pyndonkam ïa kata ka jingstad ka long shisha ka jingkyrkhu ha ka longbriew-manbriew. Pynban ha kawei ka liang ïa ki bym nang pat ka wanrah ïa ka jingjot ym tang ïalade hynrei wat ïa kiwei ruh.
Ka jingwan jong ka mobile ka la long kawei na ki kor kaba la pynsuk shibun ym tang ha ki kam ki jam ba man la ka sngi ki jong ngi, hynrei wat ban pynïajan ha kaba ïakren-ïakhana bad la ki baieid-bathoiñ, ki paralok-parajor kiba sah sha kiwei pat ki jaka, ki jylla ne ki ri kiba jngai. Ha kum kane ka por kaba mynta, imat ym don shuh kiba khlem pyndonkam mobile, naduh ki tymmen ki kro haduh ki khyllung-khynnah. Teng-teng haba peit ïa ka rukom ai bat mobile jong ki kmie ki kpa ïa la ki khun ki kti kiba dang rit, ka pynlong ïa ki ban sngew sarong ban pyni sha ka pyrthei ba ki khun jong ki, wat la ki dang rit ruh ki la tip bad nang ban pyndonkam ïa ka mobile. Ym tang ba ki ai bat, hynrei wat haba ki khun kim treh bam jingbam ne leh kiwei-kiwei ki kam, la pynsngewtynnad bad pynbyrngia ïa ki da ka mobile ba kin pyndep ïa ka jingbam ne kiwei-kiwei. Nalor kane, ki don ruh ki kmie ki kpa tang ban ïoh ban pyndep ïa la ki kam ki jam ha la ïing bad ban lait na ka kiw-kiw kaw-kaw jong ki khun, ki ai da ka mobile ba kin sngap jar.
Kumta haba ngam jylliew la shem ba ki mobile phone ki lah ban wanrah katto-katne ki jingma ïa ki khynnah, kata ba ka jingpyndonkam palat ka lah ban wanrah ïa ka jingshitom ki khmat, shem shitom ban ïohthiah bad ka jingduna ka jingtreikam jong ka met. Ki khynnah ki lah ban ïakynduh ïa ka jingshah lehbeiñ ha ka ‘online’ kaba ktah ïa ka koit ka khiah jong ki. Ka jingsuk ban ïoh ïa ki jingthoh kiba shai ne kiba lah ban pynmynsaw ka lah ban long ka jingeh. Ki phone ki lah ban pynlong jingdih buaid, kaba ïalam pat sha ka jingbym shimkhia ïa ki jingkitkhlieh bad ki jingïadei para briew. Ki jingma na ka bynta ka jingshngaiñ, ha kaba ki lah ban ïasam ïa ki jingtip ba kyrpang ne ïakynduh bad ki briew ki bym tip, kaba pynkiew ïa ki jingma. Kumta ka long kaba donkam bha na ka liang jong ki kmie ki kpa ban peitngor bad ïasyllok bha bad la ki khun ban ïarap pynduna ïa kine ki jingma.
Ka jingdon jong ki mobile phone, khamtam ha ki kti jong ki khyllung-khynnah la ïohi ba ka la long shisha ka kor kaba la lah ban pynbyrngia ïa ki haduh ba kim tip shuh ïa la ki kam ki jam, ka por bam, ka por khreh kot, ka por ïalehkai ne kiwei kiwei, kat haduh ba ki la ngop bad kyrni kumba la shah teh ha u kynjri bym lait khih shuh. Kane ka dei ka bynta kaba kum ki kmie ki kpa ki hap ban peitngor bad phikir bha ïa la ki khun ki kti ban peit ba kim dei ban shah teh ha une u kynjri uba eh pat ban bthat ynda ki la kyrni. Hooid ha ka jingïaid jong ka por bad khamtam lei hadien ka jingwan jong ka jingpang khlam Covid, kaba la plie lad plie lynti ha ka ban pyndonkam kham bun por ha ki mobile phone ne kiwei ki kor internet khamtam na ka bynta ki khynnah pule. Ïa ki jingpule baroh ha kito ki por na ka jingdon ka khlam Covid la hap ban pyndep lyngba ka mobile. Kane ka la pynlong ruh ïa ki kmie ki kpa ban hap pynthied mobile ïa la ki khun ki kti bad kumta ha kito kiba nang pyndonkam ka la long shisha ka jingkyrkhu katba ha kito ki bym nang pat ka la long ka jingtim.
Kumba la kdew hangne ba ka jingdon jong ki kor internet bad mobile phone, ka la wanrah ka jingïajan ha ka ïakren-ïakhana bad ki briew kiba na ki jaka kiba jngai hynrei ha kajuh ka por pat ka la wanrah ïa ka jingïajngai kaba khraw hapdeng kawei ka ïing, kawei ka jaka trei ne wat haba leit bam jingbam ha ki dukan namar kam don shuh kata ka jingïakren-jingïakhana hapdeng shi ïing shi sem, ne shi paralok, ne para ba ïatreilang naba ka por kaba kham bun la pynlut bad lap miet beit tang ha ki mobile phone. Kumta ka shong ha kano ka dur ngi pyndonkam bad khamtam lei ba kum ki kmie ki kpa kin long kiba phikir bad peitngor bha ïa la ki khun ki kti ban lait na kino-kino ki jingjia sngewsih ne ki jingeh kiba lah ban mih hadien-habud.
