Agartala, Naiwieng:
Ka Tipra Motha, kaba dei ka seng ba la ïatreilang bad ka BJP kaba lamkhmat ïa ka sorkar synrop ha Tripura, ka la pynlong ïa ki jingïalap paidbah ha kylleng 35 tylli ki Block ban wanrah ïa ki kam pynroi ha thaiñ nongkyndong ha ka Sngi Palei ban pynbiang na ka bynta ki lai tylli ki jingdawa ba kongsan.
Ka seng ka la ai ïa ka dorkhas kaba la thoh sha u Lat ka jylla Tripura lyngba ki ophisar jong ka Block Development, ha kaba la kyntu ban pyntreikam kloi ïa ka Tiprasa Accord, ban pynlong ïa ka ilekshon Village Committee (VC), bad ban mynjur ïa ka 125th Constitutional Amendment Bill ha Parliament.
Haba pynpaw ïa ka jingdonkam jong ka jingïarap jong u Lat ka jylla ha kaba pyntreikam ïa ka jingïateh kular Tiprasa, ka dorkhas jong ka seng ka la ong: “Ïa ka jingïalang ba nyngkong eh jong ka kynhun treikam ne ka kynhun ba ïatreilang-ba la thaw ban buddien ïa ka jingpyntreikam ïa ka jingïateh kular-la khot ha ka 20 tarik, Nailur, 2024, ha New Delhi. Katba la shim ïa ki sienjam ba nyngkong, ngi pan da ka jingburom ïa ka jingïarap jong phi ban pynsted ïa ka jingtreikam baroh kawei bad ban pynthikna ba ïa ki jingkular ba la ai sha ki jaitbynriew trai ri trai muluk yn burom kloi. Kane kan ïarap ban pynpoi ïa ki jingmyntoi ba la thmu sha ki paidbah kiba dei hok khlem da buhteng na ki kam bym donkam.”
Haba kren shaphang ka jingpynslem ïa ka ilekshon VC, ka Draft jong ka seng ka la pynksan ba wat hapdeng ka jingïadonkti jong ka High Court, ki jingeh ba la kdew da ka tnad ilekshon jong ka jylla ki la pynsangeh ïa ka jingïaid lynti jong ka ilekshon.
Ka samoi treikam jong ki Village Committee ki la kut ha u snem 2021, bad naduh kata ka por, ym shym la don shuh ki kynhun ba la jied ban peit ïa ka jingsynshar shnong.
