Ka jingjia ba dang shen halor ka jingkhlad noh jong uwei u samla ba ñiah thuk-thuk ïa kaba la kynnoh ba la tynrah da ka kali synran ne ‘Escort’ jong u Myntri ka Sorkar Jylla ka la pynkhihwin ïa ki paidbah ka jylla bad lah ruh ban sakhi ïa ki jingpynrem kiba jur ha ki rynsan Social Media pyrshah ïa u Myntri. Kane ka jingjia ka la pynlong haduh ba ka la mih ruh ka jingdawa ba la dei ban pynsangeh noh ïa ka ‘VIP Culture’ hapoh ka jylla ba ka la pynwit shi katdei eh ïa ki ‘riew paidbah ha ka leit ka wan bad ruh ba ka long pat kawei na ki daw jong ka jingwanrah ïa ka dheng kali khamtam ha nongbah Shillong namar ka jingrit jong ki surok.
Lah ban pynkynmaw ba ka la wanrah ïa ka jingkthang mynsiem bad ïam briew ha kawei na ki longïing kaba la duh noh ïa la u baieit bathoiñ na ka jingjia shah tynrah ka thuk-thuk ha ka janmiet jong ka Sngi Thohdieng ha ki bynta jong ka ICAR, katba u dang don ha lynti ban leit sha ka tamasa Cherry Blossom kaba dang shu kut ha ka Sngi Saitjaiñ. Katkum ki jingpynpaw bad phla da kawei ka samla kynthei kaba dei ka paralok jong u Hudderfield Rymbui, kaba la shong lang ha ka thuk-thuk kaba la ñiah da une u samla, ka la ïathuh ba ka jingtynrah ka dei beit da ka kali ‘Thar’ jong ki pulit bad ka la kren shai ruh ba kam shym la dei ka jingbakla hynrei ba ki pulit ki la leh khnang bad mar ïa dep kim shym la sangeh hynrei ban phet krad beit-beit na katei ka jaka.
Kane ka jingjia ka la pynkhihwin shi katdei eh ha ki rynsan social media, bad ban pynrem jur ïa kane ka jingleh ki pulit kumba la kynnoh bad wat na ka liang jong ki bahaïing bahasem jong utei u samla ruh ki la dep ban ujor ejahar na ka bynta ban ïoh ïa ka hok. Ka jingkylli kaba mih mynta ka long ba la kata ka jingtynrah ka dei da ka kali ki pulit ne ka dei ba leit tynrah ruh, ïa kaba ngin ym lah ban pynshisha hynrei tang kiba sakhi ïa kane ka jingjia kiba lah ban tip ïa ki jingshisha baroh. Pynban kawei ka bynta kaba pynlyngngoh ka long balei kata ka kali pulit kam sangeh ban ïarap hynrei ban phet krad beit wut kumba la kynnoh. Haduh katno kata ka tamasa ka long kaba kongsan, ba ym don shuh ïa ka jingsngew para briew.
Balei kita ki heh ki haiñ ki hap ban her kyrkieh haba ki leit sha ki tamasa paidbah? Haduh katno ka long kongsan ïa ki ban poi sha kata ka tamasa? Ha ka jingshisha haba sngewthuh ba ka long kongsan ban poi, te balei kim pynjynjar lem ban mih noh kham kloi? Balei ban pynsohsat kai ïa u paidbah? Ngi la sakhi ba ka jingdheng kali ha ka sngi sdang ïa ka tamasa Cherry Blossom ka la long kaba jur katta-katta haduh ba ym ithuh-ithaw shuh ka jingïatynruh ki kali. Kiba bun ki nongleit sha ka tamasa Cherry Blossom ki la pynpaw ïa ka jingsngewkhia bad ong ba ka jingjur ka dheng kali ka wan jia tad ynda la wan tynruh ki heh ki haiñ ryngkat ki jingpynpah ïa ka siren, haduh ba wat ki pulit pynïaid kali ruh ki la shem jingeh namar ka jingïatynruh jong ki kali, ha kaba la sakhi ruh ba la mih haduh lai laiñ ki kali kiba hiar ha katei ka surok ban poi sha Bhoirymbong.
Hooid, haba don ki jingïalang kiba kyrpang ban ïakren na ka bynta ki lynti saiñ kam (policy) jong ka Jylla, kum ki Myntri Rangbah, ki Symbud Myntri Rangbah lem bad kiwei ki Myntri ki hap ban her kyrkieh ban poi biang por, hynrei ym lah ban sngewthuh pat haduh katno ka long kaba kyrkieh ban ïabeh ban poi kloi sha ka kam tamasa paidbah na ka bynta ban ïa leit ïa leh kmen leh sngewbha, khlem da don shuh ka jingïatip lem wat haba don ka jingduh noh jong ki mynsiem briew. Ha ka jingshisha kum ki pulit haba ki la ïohi ïa kane ka jingjia, ki la dei ban sangeh ne pyntip mar-mar sha kita ki heh ki haiñ ba ki synran bad pahara khnang ban ïoh leh eiei, hynrei ban shu her bak kumba la mih ka jingkynnoh ka long ka bym ïahap satia haei-haei ruh.
