Imphal, Naiwieng:
Ki jinglong jingman ha Imphal ha Manipur ki la shah ktah jur hadien ba ïa 6 tylli ki metïap jong ki briew, kiba kynthup ïa lai ngut ki khynnah rit, la ïoh na Jiribam distrik, ha kaba kane ka la pynlong ïa ki bor ba dei khmih ba kin pynsangeh treikam noh ïa ka Internet ha kiba bun ki distrik.
U Laisharam Herojit, uba dei uwei na kiba sah ha ka jaka sah shipor ha Jiribam distrik, u la pynthikna ba ki bahaïing jong u, ki la shah pynïap, ong ka tyllong khubor.
Ka met jong u khun jong u kaba dang 2 snem ka rta kaba khlem khlieh bad ka met kaba la pyut jong ka kmie jong u kaba don 65 snem ka rta la lap ba ka la ngam ha ka wah, la bynrap shuh shuh ka khubor.
Ka kurim jong u Herojit, ar ngut ki khun, ka kmie tymmen, ka para jong ka kurim, bad u khun jong ka, ki la shah rahbor ha ka Lah Sngi U Blei jong ka taïew ba la lah na katei ka shnong kaba don hajan Assam bad hadien la pynïap ïa ki da ki lehnoh Kuki kumba la suba.
Ïa ka met khlem khlieh jong u khun jong u, la lap ba ka la sahkut hapdeng ki tnat dieng ha ka wah, katba ïa ka met jong ka kmie jong u kaba la lyng-khuit shiteng la lap ba ka la ngam shapoh.
U L Chingheinganba, u khynnah bad ka kmie tymmen jong u, ka Y Rani Devi, ki dei napdeng ki hynriew ngut kiba ha ïing ha sem kiba la shah rahbor ha ka Lah Sngi U Blei ha ka jingïakhun hapdeng ki lehnoh bad ki pulit ka Central Reserve Police Force (CRPF) ha Borobekra, Jiribam, kaba jngai kumba 220 km na Imphal, la bynrap shuh shuh ka kaiphot.
Kitei baroh ki lanot ki dei na ka jaitbynriew Meitei bad ki la sah ha ka jaka sah ba shipor kaba la buh ha thanat Borobekra naduh ba la mih ka jingkulmar ha katei ka thaiñ ha u bnai Jylliew.
