Bertina Lyngdoh
Mano ban mutdur ba phin poi sha ka thong bad mano ban mutdur ba phi don ka thong ? La phi tlot ha ki dkhot met hynrei ha ka jingïakhun phi long kiba khlaiñ bor wat haduh ba phin rah ïa ka nam lah duh. Phi long ruh ki khlur ki bym tieng bym riej ban ïakhun bad kito kiba biang ha ki dkhotmet. Ka jingshlur jongphi ka kyrsiew ïa ki khun samla kiba bun khamtam ïa kito ki bym shlan ban mih madan bad sei madan ïa ka sap ka phong jongki.
Namar ka jingstad ka pyrthei mynta, ki jingïalehkai kum ka dak ban ïakhun ban ïoh bad rah ïa ka nam lah duh, ka imlang sahlang ka la long kaba kynthup lem ne ai bynta lem ïa ki bym biang ha ki dkhotmet ban ïa aireng bad kiba biang. Ka jinglah ban sei madan ïa ka sap kyrpang ka pynlong ïa kiba bun ban ïoh ïa ka jubab kaba baroh ki ju kylli ba kumno ki lah ban ïakhun ha ki jingïalehkai haba kim ïohi ki khmat. Hynriew la lai kam long kaba suk ban pynliem khamtam haba phi ïakhun kynjat bol tang da kaba sngap ïa ka jingriew jong ka bol bad ban pyni ïa ka dak ka jingjop. Ban sei madan ïa ki sap kyrpang bad ban pyrshang ban ïoh bad rah ïa ka nam lahduh, kam long kaba eh lada biang ha ka jingkyrshan pisa. Sngewsih pat ban ong ba bunsien ka jingkynjoh sha ka thong ka khanglad namar ka jingbym biang ka jingkyrshan pisa kata ym tang uba duna ha ki dkhotmet hynrei wat u ba biang ruh. ïa kane ka jingeh ki khun samla ki ju mad na ka por sha ka por. Dei na kane ka daw ba haba don ki jingïakob khamtam kiba dei kiba hap leit shabar ka jylla ne shabar ka ri, bun kim da poi sha ka thong namar ka jingjynjar ha ka pisa ka pilain. Bun na kito kiba don iaka sap kyrpang, ki dei kiba wan na ka longïing longsem kaba duk. Bun ruh na kine ki dei ki khun ki kti jong ki kmie ki kpa ki bym nang bym stad.
Kumta, ka jingkhublei kyrpang sha ka Meghalaya Blind Football ha kaba ka la wanrah ïa ka jingjop ban rah ïa ka nam lah duh pyrshah ïa ka Rangdajied United Football Club da hynriew la lai goal. Wat lada phi la duhnoh ha ka bor ïohi, hynrei u Blei pat u la plie da kawei pat ka lad ka lynti ba ki briew kim ïoh ban kren ban kynnoh ïa ka jingduna jongphi. Kane ka dei ka sap kyrpang kaba u Blei u la ai kyrpang ha phi bad ka dei ruh ka sap kaba pynkren briew bha. Kane ka dei ka jingkyrkhu kyrpang da u Blei ïa kaba ki briew kim lah ban knieh ïa ka na phi. Kumta, ka jingkyntu ba ym tang ka sorkar hynrei wat briew shimet ruh, ban ai lem ka kti kamon kti kadiang kyrshan katlah katïai khamtam ha ka pisa khnang ba kin nang lah ban kyntiew ïa ka sap ka jong ki.
