Lucknow, Naiwieng:
U MP jong ka seng Samajwadi Party (SP), u Ziaur Rahman Warq, uba la shah mudui pyrshah da ka mukotduma halor ka jingmudui ba u la don bynta ban pynshit ïa ka kynhun runar bad wanrah ïa ka jingïakynad kaba la pynïap ïa saw ngut ki briew ha Sambhal kaba don ha Uttar Pradesh ha ka jingjia ha ka Sngi U Blei, u la pynkhihwin ïa ki paidbah bad pynsynjor ïa ka jingïatylli ha ka jaitbynriew tang na ka bynta ka jingmyntoi ha ki kam saiñ hima-sima, la pynshisha ki pulit ha ka jingmudui ejahar. Une u la shah jer kyrteng kum u snar nongïalam ha kaba ïadei bad ka jingjia.
Kawei na ki jingujor ejahar, napdeng ki hynriew tylli kiba la ïoh da ka lad pathai khubor, ka la kynnoh ba u MP, u la leit jngoh ïa ka jaka mane blei jong ki Muslim ne ka Mosque, katto-katne sngi shwa ban jia ka jingïakynad ha ka Sngi U Blei, khlem da ïoh jingbit bad u la pynmih ïa ka jingkulmar. Hynrei u MP bad ka seng jong u ki la kyntait ïa kine ki jingkynnoh, da kaba kynnoh ba u don shabar sor ha ka por ba jia katei ka jingïakynad bad kynnoh ba ki pulit ki la thmu thombor pyrshah ïa u.
“Ha ka 22 tarik Naiwieng, u Ziaur Rahman Warq u la leit jngoh ïa ka Jama Masjid. Hadien ba u la tyrwa ïa ka jingleh niam Namaaz, u la lum ïa ki paidbah khlem ka jingbit jong ka bor synshar bad u la kren da ki kyntien kiba wanrah ïa ka jingkynad bad ka jingkhihwin. Na ka bynta ka jingmyntoi ha ka kam saiñ pyrthei, u la pynkulmar jingmut ïa ki paidbah ban pynduh ïa ka jingïatylli ha ka imlang-sahlang”, la ong ka jingujor ejahar.
Ha ka jingmudui ejahar, la kdew ruh ïa u Suhail Iqbal, u khun jong u MLA u Iqbal Mahmood bad kiwei pat kiba donlang ha katei ka jingïalum paidbah.
“U Suhail Iqbal u la pynshit ïa ki paidbah da kaba ong, ‘u Ziaur Rahman Warq u don ryngkat bad ngi, ngi ruh ngi don ryngkat bad phi. Ngim shah ba kan jia ei ei ïa phi; pyndep ïa ki jingthmu jong phi.’ Kumta, u paidbah u la nang kham shah thombor shuh shuh,” la ong shuh shuh ka jingmudui.
U Ziaur Rahman Warq, u la shah kynnoh kum u snar nongïalam ha ka jingïakynad, katba u Suhail Iqbal, u la shah kynnoh kum u nongïarap uba ar.
Ki don ruh sa 6 ngut kiwei pat kiba la shah pynpaw kyrteng ha ka jingmudui ejahar, ryngkat bad ki 700-800 ngut ki briew ki bym pat lah ban ithuh ne tip kyrteng.
Ha kaba ïadei bad katei ka jingjia la buh jingthoh bad jingmudui pyrshah.
Ka ejahar ka kynnoh ba ka kynhun paidbah kaba don 700-800 ngut kiba la kieng da ki tiar pynïap bad pynmynsaw ki la ïalum lang ban pynthut ïa ka jingkhmih bniah ba la hukum da ka ïingbishar ha Shahi Jama Masjid.
Ka jingmudui ka la kynnoh ba ki kynhun runar ki la knieh ïa ki tiar siat jong ka sorkar bad ki la thmu pynïap ïa ki pulit.
“Uwei u briew napdeng ka kynhun jong ki riew paidbah u la siat ïa u Circle Officer u Anuj Chaudhary da ka jingthmu ban pynïap ïa u. U Anuj u la shah siat na ka kjat bad u la mynsaw,” la ong ka ejahar.
Ka jingmudui ejahar kaba ar, kaba la ïoh ruh da ka lad pathai khubor, ka kynnoh ba ki paidbah ki la pynjot bad pynpait ïa ki CCTV Camera, ki la knieh ïa ki pistol bad ki kuli pynsat khmat na ki pulit, bad ki la lute ïa ki kuli siat jong ka suloi 9 mm.
“Ki kynhun ki la thombor ïa ki pulit da ki dieng Hockey, ki dieng, bad ki maw, da kaba thmu ban pynïap ïa ki,” ong ka ejahar, da kaba jer kyrteng ïa ki hynriew ngut ki briew kiba shah kynnoh. Ka la bynrap, “u Hasan, u Azim, u Salim, u Rehan, u Haider, u Wasim, u Ayan… ki la knieh jubor ïa ki tiar bad ki kuli na ki pulit, ki la thang ïa ki, bad ki la pyrta ban pynïap ïa ki. Ki paidbah ki la siat beit sha ki pulit, da kaba thmu ban khanglad ïa ka jingjurip bniah”.
U Ziaur Rahman Warq, u la kyntait ïa ka jingkynnoh jong ki pulit pyrshah ïa u, da kaba ong ba u don ha Bengaluru ha ka por ba jia katei ka jingjia.
“Ngam shym la don wat ha ka jylla, lymne ha Sambhal. Kane ka dei ka jingïasuhbuit sniew jong ki pulit bad ka bor synshar. Haba ki paidbah kim tip ïa ka por ban leh ïa ka jingjurip, kumno kin thmu ïa kano kano ka jingthmu ka ban pyni ïa ka jingleh pyrshah?,” u la kylli.
Ka Shahi Jama Masjid kaba don ha Sambhal ha Uttar Pradesh ka la sakhi ïa ka jingïakynad kaba jur bha ha ka step jong ka sngi U Blei haba ka kynhun ba la thung da ka ïingbishar ka la poi ban pynlong ïa ka jingwad bniah. Ïa kane ka jingjurip la hukum halor ka jingujor ba la kynnoh ba la pynpra ïa kawei ka jaka mane blei barim jong ki Hindu ban tei ïa ka Mosque da u syiem Mughal Babur ha ka spah snem kaba 16.
Ki paidbah ki la pyrshah ïa katei ka jingjurip bad ki la ïaleh pyrshah bad ki pulit, ha kaba saw ngut ki nongïakhih ki la ïap bad bun ki la mynsaw.
Ki nongïakhih ki kam ba kine ki la shah pynïap ha ka jingsiat jong ki pulit, katba ki pulit ki kyntait ïa kane, da kaba ong ba ki paidbah hi ki la siat ïa ki kuli.
Ki bor pynïaid jong ka Mosque bad ki nongïalam jong ka Samajwadi Party ki la kynnoh ba ïa ka jingwad bniah ha ka sngi U Blei, kaba ar hadien ka jingwad bniah ba nyng-kong ha ka 19 tarik, Naiwieng, la pynlong khlem da pyntip lypa.
Ki la kynnoh ba ka bor pynïaid distrik ka la pynmih ïa ka jingkulmar. Katba ki pulit bad ki nongujor ki pynskhem ba la pyntip lypa ïa ka Mosque.
Ka sorkar Uttar Pradesh, ka la bthah ban pynlong da ka jingtohkit Majistor halor kane ka jingjia.
