Mumbai, Naiwieng:
Ha kum kane ka por ba don hapdeng ki jingkhmih lynti mano ban long Myntri Rangbah jong ka Maharashtra hadien ka jingïakhun kaba i hun jong ka kynhun Mahayuti ha ka ilekshon sha ka Ïingdorbar Thawaiñ, u Eknath Shinde u la kyntu ïa ki nongkyrshan jong u ba kin kiar na kaba ïalum lang ha ka ïing sah jong u, ka ‘Varsha,’ kaba don ha South Mumbai, ban ïasaid na ka bynta ban pynlong ïa u kum u Myntri Rangbah ka jylla.
U nongïalam ka Shiv Sena u la kyrpad kyrpang ïa ki nongkyrshan ba kin kiar na kaba ïalum lang shabar jong ka ïingsah jong u ka ‘Varsha’ ne kano kano ka jaka kaba don jingïadei bad u. “Hadien ka jingjop kaba khraw jong ka kynhun Mahayutti, yn thaw biang sa shisien ïa ka sorkar jong ngi ha kane ka jylla. Kum ka kynhun kaba heh, ngi la ïaleh ilekshon lang bad ngi dang ïadon ryngkat haduh kine ki sngi. Namar ka jingïeid ïa nga, katto katne ki kynhun ki la kyrpad ïa baroh ban ïalumlang bad wan sha Mumbai. Nga sngewnguh shibun eh ïa ka jingïeid jong phi. Hynrei nga kyrpad ba ym dei ban don mano mano ba wan lang ha ka jingkyrshan jong nga ha kum kane ka rukom” ong u Eknath Shinde ha ka rynsan phah khubor ha X.
“Sa shisien ka dei ka jingkyrpad kaba sngewrit jong nga ba ki nongbud jong ka seng Shiv Sena kim dei ban ïalum lang ha Varsha Niwas ne shano shano ruh. Ka kynhun synrop kaba heh ka la long bad kan dang ïai long kaba khlaiñ na ka bynta ka Maharashtra kaba khlaiñ bad kaba roi,” u la bynrap.
Ka kynhun Mahayuti ba la ïalam da ka seng BJP, ka la ïoh ïa ka jingjop kaba radbah ha ka ilekshon sha ka ïingdorbar thawaiñ jong ka Maharashtra, ha kaba ka la ïoh 230 na ki 288 tylli ki konstitwensi. Hynrei ka rai halor ka jingjied Myntri Rangbah jong ka jylla ka dang sahkut.
Ki nongkyrshan jong u Eknath Shinde ki kyrshan ïa ka jingbteng jong u kum u Myntri Rangbah, da kaba kdew ïa ka jingjop kaba khraw jong ka kynhun synrop hapoh ka jingïalam jong u. Ha kajuh ka por, ki nongïalam ka seng BJP, kiba rakhe ïa ka jingïoh buh ïa ka jingjop ha ki konstitwensi jong ki, ki dang ïaleh ban shimti ïa ka kam Myntri Rangbah ha ka sien kaba lai.
Ha ka ilekshon kaba long ha ka 20 tarik, Naiwieng, ka seng BJP ka la jop ha ki 132 tylli ki konstitwensi, katba ki seng ba la ïatreilang kiba kynthup ïa ka Shiv Sena bad ka NCP, ki la jop da 57 bad 41 tylli ki konstitwensi. Ka jingñiew vote ka la kut ha ka sngi Saitjain.
U heh nongïalam jong ka seng BJP u Devendra Fadnavis, uba long u kyrtong uba khlaiñ na ka bynta ka jingïakhun ban ïoh ïa ka shuki Myntri Rangbah, u la poi ha New Delhi, ha ka miet jong ka Lah Sngi U Blei ban ïakynduh ïa ki nongïalam ba hakhliehduh jong ka seng.
La khmih lynti ba un ïakynduh ïa u Myntri ka tnat ki kam pohïing u Amit Shah bad u President ka seng BJP u J.P Nadda ban ïakren halor ka jingthaw ïa ka sorkar ban wan ha Maharashtra. Hashwa, u nongïalam jong ka seng BJP u Devendra Fadnavis u la ong ba ka jingjop jong ka kynhun Mahayuti kan ïai bteng ban “pynshlur ïa ka Maharashtra jong ngi” ban pynurlong ïa ka jingangnud jong ka ri India kaba kiew shaphrang hapoh ka jingïalam jong u Myntri Rangbahduh ka ri u Narendra Modi.
