Imphal, Naiwieng:
U President jong ka Congress ha Manipur u Keisham Meghachandra ha kine ki khyndiat sngi ba la leit u la ong ba ki heh nongïalam jong ka seng kin rah ïa ka mat ha kaba ïadei bad ka jingdon jong ki jingïakynad kaba dang ïai bteng ha ka jylla ha ïingdorbar hapoh ka jylla.
U la pynpaw ruh ïa ka jingngeit skhem ba baroh ki MP kiba don kajuh ka jingmut hapoh ka kynhun synrop INDIA kin rah ïa kane ka mat ha Parliament ha kane ka Dorbar Tlang kaba dang ïaid shakhmat kaba la sdang naduh ka Lah Sngi U Blei.
“Ki nongïalam rangbah jong ka AICC ki la ïathuh ïa nga ba ka seng Congress kan wanrah (dawa) na ka bynta ka jingïatyrko nia halor ki kynrum-kynram bad ki jingïakynad kiba la jia ha Manipur hapoh Parliament,” u la ong ha ka jingthoh ba u la phah ha ka rynsan X.
Ha kajuh ka por, ha kawei pat ka jingthoh kaba u la phah ha ka rynsan X, u MP ka seng Congress jong ka Inner Manipur Lok Sabha konstitwensi, u Angomcha Bimol Akoijam, u la ong,
“Ka jingkhanglad ban don ka jingduh ei jong ki mynsiem jong ki briew kiba lui-lui, kiba kynthup jong ki shynrang, kynthei bad jong ki khyllung khynnah ha kine ki por ba don ha ka jingïakynad ha ki 18 bnai ba la lah ki dei ki jingjia ba la mih na ka jingïakhleh lang ki kam pynïap briew na ka jingkhie thma halor ki jing-leh kam saiñ pyrthei halor ka jingpeit khmat ïa ki rukom pyntreikam halor ki kynhun jait bynriew kaba kyrpang jong ka jylla kaba wad ïa ki katto katne na ka bynta ka thong ha ka kam saiñ pyrthei bad ki thong ba kongsan da kaba pyndonkam ïa ka Manipur kum ka kynhun kaba rit na ka bynta kane.”
“Ka jingpynïap ïa ki kynthei bad ki khynnah hadien ba la rahbor bad ban pyni ïa kine ki lanot ki bym ïoh jingïarap ha ki lad phah khubor, bad pynishai ïa ka kam ba shyrkhei lyngba ki buit da kaba leh ïa ki buit pynshitom bad kum ka jingshim kput ha ka bynta kaba thymmai ban leh ïa ki kam thombor ki dang bteng mynta ha Manipur. Ka kren tang shaphang ka kam beaiñ, jong ka akor katkum ka kam saiñ pyrthei,” u la bynrap.
Ha kajuh ka por, ka seng Trinamool Congress kan rah ruh ïa ka mat jong ka jingïakynad kaba dang ïai bteng ha Manipur ha kane ka dorbar Tlang jong ka Parliament, da kaba dawa ïa ka jingïatai bad tyrko nia kaba bniah bad ban shim ïa ka jingtuklar kaba kyrkieh jong ka sorkar pdeng katba ka dang pynleit jingmut ha kaba wad ïa ki jubab lyngba ki jingïakren ym ban pynthut ne khanglad halor jong ka.
Ha ka jingïalang jong ki nongsynshar jong ka ri, kaba la pynïaid da ka heh nongïalam jong ka seng bad ka Myntri Rangbah jong ka West Bengal, ka seng TMC, ka la rai ba ki MP jong ka, kin pynpaw ïa ka jingkulmar kaba kham khraw ha ka thaiñ Shatei-lam-Mmihngi jong ka ri India, ha ka por jong ka dorbar Tlang, kaba la sdang ha ka lah sngi U Blei, da kaba pynksan ïa ka jingdonkam ban pynleit jingmut bha ha kaba ïadei bad ka jingpynphai biang ïa ka ka jingsuk bad jingsuk ha ka thaiñ.
“Ngin sa wad jubab na ka sorkar halor ka jingkulmar kaba dang ïai bteng ha Manipur. Ngi kwah ïa ka jingïakren bad ngi kwah ba ka sorkar pdeng kan shim ïa ka jingtuklar. Hynrei ngi kwah ïa ki jingïakren bad ngim ai jingkyrshan halor ki kynrum-kynram,” la ong uwei u heh nongïalam jong ka seng TMC hadien ba la dep ban pynlong ïa ka jingïalang.
