Aizawl, Naiwieng:
U Myntri ka Sorkar Pdeng uba khmih ïa ki kam jngohkai pyrthei u Gajendra Singh Shekhawat u la ong ba ka sorkar pdeng ka la long kaba la khreh na ka bynta ban tyrwa ka jingïarap sha ka jylla Mizoram na ka bynta ban kyntiew ïa ki kam jngohkai pyrthei ha ka jylla.
U Shekhawat u la ong ba ki jylla ba don ha ka thaiñ Shatei-lam-Mihngi, kiba kynthup ïa ka Mizoram, ki riewspah bha ha ka liang ki kam jngohkai pyrthei bad ki don ki lad ki lynti na ka bynta ban kyntiew bad pynkhlaiñ ïa ki rukom pyntreikam ha kaba ïadei bad ki kam jngohkai pyrthei.
U la ong ba ka sorkar pdeng ka la treikam na ka bynta ban kyntiew ïa ki kam jngohkai pythei na ka bynta ban lah pynbit-pynbiang bad pynmih kam ïa ka pateng ban wan ha kane ka thaiñ.
“Ka sorkar pdeng ka la don ka mon ban leh ïa kane bad ka la long borabor kaba la khreh na ka bynta ban ai jingïarap bad jingkyrshan na ka bynta ki jylla Shatei-lam-Mihngi lada ki sorkar ki buh ïa ki jingkyrpad ha kaba ïadei bad ki projek ba ïadei bad ki kam jngohkai pyrthei,” u la bynrap. U Myntri ka sorkar pdeng, u la ong ba katba ki la don bun tyli ki projek ba la pyntreikam kum ki lad jingïarap jong ka sorkar pdeng, ki la don shibun kiei kiei ki ban leh ha kum kine ki por na ka bynta ban kyntiew ïa ki kam jngohkai pyrthei ha Mizoram.
U Shekhawat u la ong ba kin ym don kino kino ki jingeh ha kaba ïadei bad ka jingpynïoh pisa na ka sorkar pdeng lada ka sorkar Mizoram ka snohkti bad ïatreilang ha ka rukom kaba dei bad ka sorkar pdeng.
