Kular ka Sorkar Mizoram ban thied ïa saw jait ki mar rep na ki nongrep

Ka jingpyrshang jong ngi ka ïaid beit ïaid ryntih," ong u Vanlalruata haba kren ha ka jingïalang jong ka seng ha ophis jong ka ZPM hangne.

Aizawl, Nohprah:

Ka Sorkar Zoram People’s Movement (ZPM) kaba la khlieh da u Myntri Rangbah ka jylla u Lalduhoma ka angnud ban thied ïa ki saw jait ki jingthung ba la thung ha la ka jong ka jylla ban kyrshan ïa ki nongrep ha ka jylla, la ong uwei u Myntri sorkar. U Myntri ka tnad State Agriculture u PC Vanlalruata u la ong ba ka sorkar kan bat beit ïa ki jingkular jong ka hashwa ka ilekshon bad kan thied ïa u syieng, u shynrai, u sohmynken bad ki synsar na ki nongrep ka thaiñ. Ka jingthied ïa kine ki tiar na ki nongrep ka Mizoram ka dei ka jingkular ilekshon jong ka ZPM kaba la wan ha ka bor ha kane ka jylla jong ka thaiñ Shatei-lam-Mihngi ha u Nohprah jong u snem ba la lah.

“Ngi la thaw ïa ka Board pynïaid ïew ban ïadei bad ka jingthied ïa ki saw tylli ki jingthung ba kongsan. Ka Board ka dang shim ïa ki sienjam kiba tyngeh halor kane. Dang shen, ngi la pynlong ïa ka jingïalang jong ki nongthied-nongdie ha kaba katto katne ngut ki nongthied bad ki nongshalan mar na ka ri bad nabar ri ki la ïalumlang. Ka jingpyrshang jong ngi ka ïaid beit ïaid ryntih,” ong u Vanlalruata haba kren ha ka jingïalang jong ka seng ha ophis jong ka ZPM hangne.

Ka sorkar kan ai jingkyrshan ïa ki ïew jong u sying bad u shynrai naduh u Kyllalyngkot haduh u Jymmang bad u sohmynken bad u synsar hapdeng u bnai Kyllalyngkot bad u bnai Lber, u la ong. “Watla ki seng ka liang pyrshah ki kwah ba ngin shah pynkhlem raiñ ha kaba ïadei bad kane ngin ym lah ban leh ïa kata, ka sorkar ZPM ba la khlieh da u Myntri Rangbah ka jylla u Lalduhoma ka kut jingmut ban thied ïa ki saw jait ki mar rep ba kongsan,” u la bynrap.

U Myntri u la ong ruh ba la thaw ïa ki kynhun pynïaid ïew ïa ki mar rep ha baroh ki distrik bad la thaw haduh 800 tylli ki kynhun jong ki nongrep ha baroh ki shnong haduh mynta.Yn pynbna ïa kawei pa kawei ka kynhun jong ki nongrep kum ka jaka lum pisa ba nyngkong, u la ong. “Lada ki kynhun seng jong ki nongrep ki lah ban pynbeit ïa ki jingdie lilam ïa ki mar rep ba ki rep ha la ka jong ka jaka, kin die hi dalade ïa ki mar rep khlem ka jingïarap jong ka sorkar. Lada jia ba kim lah ban leh, kin wanrah ïa ki mar rep jong ki sha ki ka jaka lum pisa kaba ar ba la buh ha ki 45 tylli ki shnong da ka sorkar,” u la ong.

U Vanlalruata u la ong ba ka sorkar kan buh ruh ar tylli ki ïew die marbam- kawei kawei ha Sihphir bad ha Melthum – hajan Aizawl ha kaba ki nongrep ka thaiñ kin lah ban die ne buh ïa ki mar rep jong ki. Ha kaba ïadei bad kane, u MLA ba mynta jong ka seng Mizo National Front (MNF) bad u nongïalam ka liang pyrshah u Lalchhandama Ralte u la dawa ba ka sorkar ka thied ïa ki saw tylli ki mar rep ba la thung ha ka thaiñ kumba ka la kular. Ha ka jaka ban buh por hapdeng u bnai Kyllalyngkot bad u Jymmang, ka sorkar jylla ka la dei ban thied ïa ki jingthung ba la jied bad ban ai dor kum ban kyrshan ïa ki nongrep ka thaiñ baroh shisnem, kumba ai ka dor jingkyrshan kaba rit tam sha ki nongrep na ka bynta 24 jait ki jingthung ba la jied ha ka shisnem, u la ong.