Guwahati, Nohprah:
Ka Sorkar Assam ha kine khyndiat sngi ba la leit ka la ong ba ki aplikeshon ban ïoh ïa ka Aadhaar Card kin shah kyntait lada ki nongaplai ne ki bahaïing jong ki kim shym la aplai ban pynrung ha ka National Register of Citizens (NRC).
U Myntri Rangbah ka jylla u Himanta Biswa Sarma u la ong ba ïa kane ka rai la shim ha ka jingïalang jong ka kynhun myntri halor ka jingthmu ban wan rung tuh da ki nongshong shnong jong ka Bangladesh kaba la ngat ha ki jingeh.
U Sarma u la ong ba katto-katne ngut ki nongwan rung tuh ki la shah kem ha ki pulit ka Assam, ki pulit ka Tripura bad ki shipai ka tnat Border Security Force (BSF) ha kine ar bnai ba la leit.
“Ka jingwan buhai shnong na Bangladesh ka dei ka jingeh ïa ngi, dei na kata ka daw ba ngi donkam ban pynkhlaiñ ïa ka rukom treikam jong ngi. Ban weng ïa kane, ngi la rai ban pynkhlaiñ ïa ka rukom ai Aadhaar Card,” u la bynrap.
U la ong ba ka tnad General Administration jong ka jylla kan dei ka Nodal Agency ka ban kitkhlieh ban pyndep ïa ka jingpynshisha ïa ki nong-aplai Aadhaar, bad u Additional District Commissioner ba un long u briew uba la jied haman ki distrik nangne shakhmat.
“Shisien ba la ai ïa ka aplikeshon ba nyngkong, ka Unique Identification Authority of India kan phah sha ka sorkar jylla ban pynshisha. U ophisar jong ka Local Circle un pynshisha shwa la u nong-aplai ne ki kmie ki kpa ne bahaïing-bahasem jong u ki la aplai ban rung ha ka NRC,” la batai u Sarma.
U Myntri Rangbah u la ong ba lada ym don ka jingpan ïa ka NRC, yn kyntait mardor ïa ka jingkyrpad Aadhaar bad yn sa ai ïa ka kaiphod sha ka Centre katkum kane.
“Lada lap ba ka aplikeshon na ka bynta ka NRC ka don, u ophisar jong ka Circle un pynlong ïa ka jingpynshisha ha ka kyrdan lyngkha katkum ki jingbthah jong ka ïingbishar ba ha khlieh duh. Shisien ba u ophisar u la sngewskhem pura, yn sa mynjur ïa u Aadhaar,” u la bynrap.
Hynrei u la ong ba kane ka jingbthah thymmai kan ym treikam ïa ki nongtrei sorkar pdeng kiba trei ha kiwei ki jylla ki bym shym la apply ïa ka NRC.U Sarma u la ong ba yn pyntreikam ïa ka rukom treikam kaba pyrkhing ha kane ka rukom ban pynkhlaiñ ïa ka rukom ai Aadhaar, ban pynthikna ba ym don ki briew kiba artatien ban ïoh ïa ka ka karta.
