Guwahati, Nohprah:
Ka Sorkar Assam ka buh ïa ka jingthmu ban pynkylla ïa ki 30 lak ngut ki kynthei sha ki nongseng kam seng jam kiba jop lyngba ki Self Help Group (SHG), da ka thong kaba khraw ban pynmih ïa ka kam kaba la lum lang kaba T.30,000 klur man la u snem ha kine ki phew snem ban wan.
Kane ka jingthmu, kaba la ïalam da ka Panchayat and Rural Development Department jong ka jylla, ka thmu ban pynkupbor ïa ki kynthei bad ban noh synñiang shibun sha ka roi ka par jong ka jylla.
U Ranjeet Kumar Dass, Myntri ka Panchayat and Rural Development jong ka Assam, u la pynbna ba kumba 8.5 lak ngut ki kynthei ha ka jylla ki la dep ban kamai T.1 lak shisnem lyngba ki kam jong ki ba la ïalam da ka SHG.
Ka sorkar ka thmu ban pynïar ïa kane ka jingkheiñ sha ka 30 lak ngut ki kynthei, da kaba pynkylla ïa ki sha ki “Lakhpati Didis” (ki kynthei kiba riewspah).
U Dass u la ban jur ba ka jingpynkupbor ïa ki kynthei ka long kaba kongsan bha na ka bynta ka jingroi jingpar jong ka Assam baroh kawei.
“Da ka jingkyrshan jong u Myntri Rangbahduh ka ri u Narendra Modi bad u Myntri Rangbah ka jylla u Himanta Biswa Sarma ngi thmu ban thaw ïa ki lad ki lynti na ka bynta ki kynthei ba kin roi ki par,” u la ong.
Ka Roadmap ka kynthup ban ai pisa T.10,000 sha uwei pa uwei u dkhot jong ka SHG ha ki bnai ban wan bad ban pynsuk ban ïoh ram na ki Bank haduh T.1 lak.
Ka sorkar ka la dep ban sam 10,900 tylli ki scooter sha ki kynthei nongseng kam seng jam ban ïarap ha ka jingpynïaid ïa ki kam khaïi, bad ka don ka jingthmu ban sam sa 5,000 tylli ki scooter ha u snem ban wan.
Ka jingkyrshan pisa kaba kongsan ka la wan na ka sorkar kmie, kaba la mang T.1,577 klur ha ka pisa kaba phai bad ka jingai jingïarap pisa na ka bynta ki SHG ba la ïalam da ki kynthei.
Nalor kata, ka sorkar jylla Assam ka la sdang ïa ka Kanaklata Mahila Sabalikaran Yojana, kaba la pyllait T.445 klur ban pynkhlaiñ shuh shuh ïa ki kynthei ha ka liang ka ïoh ka kot.
Ka jingktah jong ka jingthmu ka la paw lypa. Ha ka Asomi Saras Mela kaba la pynkut dang shen, kaba la pynlong da ka Assam State Rural Livelihood Mission (ASRLM), ki kynthei nongseng kam seng jam ki la die ïa ki mar kiba shongdor T.19.69 klur, kaba kiew bha na ka jingdie ha u snem ba la dep kaba long T.8 klur.
Kaba kham pawnam ka long ba ka Purnima Mahila Self Help Group na ka distrik Lakhimpur ka la die ïa ki mar shna kti kiba shongdor T.1.04 klur tyngka ha kane ka jingïakynduhlang.
U Myntri Dass u la pynpaw ka jingshaniah ba kane ka jingthmu kan nang kiew, da kaba don ka jinglah na ka bynta ki kam ba la ïalam da ki kynthei ha ki SHG ban noh synñiang T.3,000 klur manla u snem ha ka por ban wan, ha kaba kut kan poi sha ka T.30,000 klur.
Kane ka jingroi kan don ka bynta kaba kongsan ha kaba kyntiew ïa ka GDP jong ka Assam, katkum ka jingpyrshang jong ka sorkar kmie ban kyrshan ïa ki nongkyndong, kynthup ïa ka jingpynkiew ïa ka Minimum Support Prices (MSP) na ka bynta ki nongrep.
