Shillong, Nohprah 19
Ka Shillong Lajong FC ka la mad ïa ka jingshah rem da 3-1 kol ha ka Delhi FC ha ka lympung ïalehkai I-League bad u Daniel Gon-calves u la shah sei red card shwa ban kut ka jingïalehkai ha ka sngi Palei ha Mahil -pur Stadium kaba ha Punjab.
Kane ka long ka jingshah rem kaba nyngkong eh ïa ka Lajong ha ka jingïalehkai shabar na la ïing hadien kawei ka jingjop bad mar ar tylli ki jingïakhaid bad shah rem ha la ïing.
Ha kane ka jingïakhun baroh ar ki kynhun ki la ïakhun tyngeh, hynrei ka Delhi ka la ïoh ban pynkhih jar nyngkong ha ka minit kaba 7 lyngba u Vanlalhriatzuala. Hadien shiteng kynta ka Lajong ka la lah ban pynphai kylla lyngba u Phrangki Buam ha ka minit ba 34 na ka bynta ban ïakhaid mar shi kol.
Ka Delhi ka la thep biang sa ar kol ha ka kylla miet lyngba u Stephane Samir Deiubeni Bining (54) bad u Himanshu Jangta (66). Wat la ka Lajong ka la pyrshang ban pynphai, hynrei kam shym la lah bad ka la mad ïa ka jingshah rem.
Kumta ka Delhi da kane jingjop ka la ïoh 8 point, katba ka Lajong ka dang sah 6 point na ki hynriew sien ïakhun.
Ka Lajong kan pynkhreh biang ïa ka jingkhun ha u snem thymmai pyrshah ïa ka Real Kashmir ka ban long ha ka 10 tarik u Kyllalyngkot ha Srinagar.
