New Delhi, Nohprah:
U Myntri ka tnat ki kam pohïing jong ka sorkar kmie, u Amit Shah, ha ka Sngi Palei u la pynpaw ïa ka jingshaniah ba ka thong ban pynlong ïa ka “Jammu & Kashmir kaba lait na ki kam lehnoh” kan sa urlong shen bad u la bthah ïa ki kynhun pahara ban pynthikna ïa ka jingtreikam kaba pura jong ki halor ki kam lehnoh ha katei ka thaiñ.
Ha ka jingïalang jong ki heh sorkar ba ha khlieh duh ha ka tnad ki kam pohïing ban bishar bniah ïa ka jinglong-jingman ha ka liang ka jingshngaiñ ha ka Union Territory, u Shah u la ong kum ka jingsngewïahap bad ka rukom pyntreikam jong u Myntri Rangbahduh ka ri u Narendra Modi halor ki kam lehnoh, “ngin pynurlong ïa ka thong ‘ka Jammu & Kashmir kaba lait na ki kam lehnoh,” kham kloi katba lah.
U la pynthikna ba yn wad lut ki lad ki lynti kiba donkam ban kyrshan ïa kane ka kam, la ong ka jingthoh ba la wan na kane ka tnat ba dei khmih. U Myntri ka tnat ki kam pohïing u la pynpaw ïa ka jingkular jong ka sorkar kmie, da kaba pynksan ba lyngba ka jingïatreilang jong baroh ki bor pahara, ka don ka jingkut jingmut ban pynduh ïa ki kam pyntriem jong ki lehnoh ha Jammu & Kashmir.
U Shah u la ai khublei ïa ka tnat jong ki shipai pahara namar ka jingjop jong ki ban pynduna shibun ïa ki kam pyntriem jong ki lehnoh, ka jingwan rung tuh bad ka jingpynrung dkhot ïa ki samla sha ki kynhun lehnoh.
U la ong ba ki jingbteng jong ki jingpyntreikam jong ka sorkar u Modi ki la jan pynjem khnap bad pynduh pyndam ïa ka jinglong-jingman jong ki kam pyntriem jong ki lehnoh ha Jammu & Kashmir.
U Shah u la bthah ruh ïa baroh ki kynhun pahara ban pynneh ïa ka jingïatreilang ban pynduh jait ïa ki kam lehnoh bad ban jur ïa ka jingdonkam ban pyntreikam ïa ka Area Domination Plan bad ka Zero Terror Plan ha ka rukom kaba ïadei bad ka kam.
Ha kane ka jingïalang la ïadonlang u Lieutenant Governor jong ka Jammu & Kashmir u Manoj Sinha, u Union Home Secretary, u Director (IB), u heh duh jong ka RAW, u heh shipai, u GOC-in-C (Northern Command), u DGMO, Chief Secretary bad u DGP jong ka Jammu bad Kashmir Nalin Prabhat, ki heh jong ki CAPFs bad kiwei kiwei ki heh ophisar jong ka Ministry of Home Affairs.
