Thiruvananthapuram:
U Chief Justice jong ka Kerala High Court, u Justice Nitin Jamdar, u la shah pynbam smai ha ka por 10.30 baje mynstep jong ka Sngi Palei. U la mih bujli ha ka jaka jong u Arif Mohammed Khan, uba la shah pynkynriah ban shakri ïa ka kam kum u Lat jong ka Bihar.
U Myntri Rangbah ka jylla, Pinarayi Vijayan, ka Chief Secretary, Sharada Muraleedharan, u Chief Justice, Jamdar, bad u Additional Chief Secretary for General Administration u K R Jyothilal ki la pdiang burom ïa u Lat ba dang shu shah thung thymmai bad ka kurim jong u ka Anagha Arlekar ha ka rynsan.
Hadien kata, u Chief Secretary u la pule ïa ka hukum jong ka President ban thung ïa u Lat. Ka jingshim smai ka la bud hadien kata.
Ki ‘riew donburom, kiba kynthup ïa u Lat ka West Bengal, C V Ananda Bose, u Lamphang ka Ïingdorbar, A N Shamseer, ki Myntri kiba kynthup ïa u K N Balagopal, u P Rajeeve, u Roshi Augustine, u K Krishnankutty, u Kadannappally Ramachandran, u V Sivankutty, u G R Shanil, u Muhammad Riyas, u V M.P. Tharoor bad u A A Rahim, ki la ïadonlang ha katei ka jingïalang.
Hadien kata ha ka por janmiet, u Lat bad kiba ha ïing ha sem jong u ki la dem nguh ha ka Sree Padmanabha Swamy Temple hangne.
Ki bor pynïaid jong ka temple ki la pdiang sngewbha ïa u da ka Onavillu ba pawnam, ka dur jong u blei Padmanabha, bad ka Almanak.
U Arlekar, u la poi ha ka nongbah jong ka Kerala, ha ka janmiet jong ka Sngi Balang bad la pdiang burom ïa u ha ka Internation Airport, da u Myntri Rangbah ka jylla, u Vijayan, u Lamphang u Shamseer, bad ki Myntri, u K Rajan bad u Ramachandran Kadannappally.
Ha ka taïew ba ladep, ka President ka India, ka Droupadi Murmu, ka la thung ïa u Khan, kum u Lat bathymmai jong ka Bihar bad pynlong pat ïa u Lat ba la mih noh, u Arlekar, kum u Lat jong ka Kerala.
