Patna, Nailur:
Ka jinglong jingman ha kaba ïadei bad ka jingshlei um ha Bihar ka la nang jur shuh shuh namar ba palat 34 lak ngut ki briew ha kylleng ki 13 tylli ki distrik ki la shah ktah, ha kaba ki bor synshar ki la phah ïa ka jingmaham ha ki jaka ba shapoh hadien ba ka um jong ka wah Ganga ka la shlei ïa u dak ba ap jingma ha Sultanganj ha ka distrik Bhagalpur ha ka sngi Ba-ar, la ong ki heh sorkar .
Na ka liang u Myntri Rangbah ka jylla u Samrat Choudhary u la bthah ïa ki ophisar naduh ka lah sngi U Blei ba kin pynjur ïa ka jingïarap bad jingpyllait im katba u dang jurip ïa ki jaka shet jingshet jong ki paidbah na ka bynta kiba la shah ktah ha ka jingshlei um ha Vaishali bad Bhagalpur.
Ki heh sorkar ki la ïathuh ba 190 tylli ki jaka shet jingshet paidbah ki dang pynïaid ha ki distrik bapher bapher kiba la shah ktah ha ka jingshlei um, katba 1,429 tylli ki lieng la pynbor ban treikam na ka bynta ki kam ai jingïarap bad jingpyllait im.
U Choudhary bad u Symbud Myntri Rangbah u Vijay Kumar Choudhary ki la jurip ïa ki jaka shet jingshet jong ki paidbah ha Vaishali bad Bhagalpur, bad bthah ïa ki bor synshar shnong ban ïai buddien ïa ki kynroh wah bad ban peitngor bha ïa ki jaka ba lah ban shah ktah.
Ki bor pyniaid ki la dep ban pynbna ïa ka jingmaham ha ki jaka ba don sharum jong ka wah Ganga hadien ba ka wah ka la ktah ïa ka dak shlei um kaba heh tam ha Gandhi Ghat bad Hathidah ha Patna.
