U Nongsaiñ Hima,1979
La ju iohsngew shaphang ki nemsniew, ki jingkyrduh ki jingiap thngan bad ki jingiap them.Kawei pa ki nemsniew kiba khraw kaba jia ha Ri India ka long ha Bengal ha ka snem 1943. Lyngba ki por ngi ju iohsngew shaphang ki nemsniew. Ka History kam ju klet ban buh jingkynmaw ïa ki nemsniew kiba khraw.
La ong ba kawei na ki nemsniew kiba khraw tam kiba la jia ha ka pyrthei ka long ka nemsniew kaba la jia ha ka pyrthei ka long ka nemsniew kaba la jia ha Samaria ha ki hajar hajar snem ba la leit noh. La ïathuhkhana pateng ba shisien ha kawei ka por U Syiem jong ka Syria u la lum ïa la u phud u pyrton ban leit hiar thma ïa ka Samaria. Te kawei na ki kam ba u la leh ka long ban ker tawiar ïa ka Samaria. (ïa ka Samaria la ker kut da kynroh kiba skhem). Ki shipai Syria kim shym lah ban rung shapoh. Ki sngi, ki taiew ki la nang iaid bad ka jingkyrduh ka jingthngan ka la sang ban synshar.
Kawei na ki jingjia kiba sngewshyrkhei eh ka long ba la don ki kmie kiba la kloi ban ïakut ban pyniap ïa la ki jong ki khun, ban bam ïa ka doh jong ki namar ba ym don ei ei shuh ban bam. La ong ba kawei ka kmie ka la leit mudui ha u Syiem ba ka la kloi ban ai ïa la i khun bad ban ïa bam. Hynrei ynda la dei pat ka pali jong kawei pat ka kmie ban ai ïa la I jong I khun, kata ka kmie ka la len kular ban buhrieh ïa la I khun. Kum ïa kine ki jingjia ka History ka la buh jingkynmaw khnang ba ki longdien kin tip kaei kaba la jia ha ki por jong ki longshuwa.
Haba ïakren shaphang ki jingthnga jingkyrduh ym lah khlem da ïa puson ïa ka jingjia ha ki por mynta. Imat kaba biang suda. Ka pyrthei ka la nang tan nang tan. Hynrei teng teng kum hap pyrkhat hato ka pyrthei ka la nang tan mo ade? Namar haba peit kai, ka jingleit baiskop ruh ym shym duna, ka jingleit restaturant ruh ym shym duna, ka leit sha ki lat ki rong bad ki tamasa ruh imat kam shym duna.
Ka jingkyrduh ha ka liang ka bam ka dih ka long kawei na ki daw kiba pyntroin la ka met ka phad. Ka met ka phad ka long kaba don burom, namar dei ha ka met ba ka mynsiem ka shong Shu shuh wat haba ka mynsiem kam don shuh ha ka meh ngi dang burom hi ïa ka met bad ngi pynkhuid ta ka ha ka rukom kaba don burom, la ka long da kaba thang ne da kaba tep. Ha kane ka bynta ym sngew lah khlem da pyrkhat ïa kito kiba ibein ïa la ka met, kim riam kim beit, kim kup kim sem satia ha ka rukom kaba idonburom ishongkun, ishongbriew ishongblei. Imat ka don ka jingkyrduh jain. Lada ym dei ba kyrduh jain te lah ban long ba ka don jingbym biang ha ka rukom pyrkhat lane ba ka don ka jingkyrduh ha ka liang ka bor sngewthuh.
Nalor ka jingkyrduh ha ka liang ka bam ka dih bad ka jain ka nep, don sa kawei ka jingkyrduh kaba ma tam, khamtam lada kata ka jingkyrduh ka don ha ka jaidbynriew kaba rit paid. Kata ka jingkyrduh ka long ka jingkyrduh ka bor ban ri ïa la ka burom ka ijot la jong kaba ki ong ha ki ktien phareng “Self Respect.” Kum ka jaidbynriew ngi don tang kumba saw lak eiei suh, hynrei ka don ka jingshngain lada kiba bun ki dang don ïa kane ka jinglong babha bad ba don burom. Kaba sngewsih ka long ioh ba ka rynïeng ka rynjot jong ngi la long kaba lah ban pynshongdor bad ba lah ban thied.
