U Kñi ha ngi ki Khasi u don ka bor kaba khlaiñ bha ha shuwa ka jingwan synshar u phareng (Dohlieh). Ha ka pang ka shitom bad ka ïap ka im dei u kñi uba kit ba bah bad uba leh niam leh rukom. Kane ka long ka jingïathuh khana pateng ki tymmen kiba la im palat spah snem ki bym don shuh ha kane ka pyrthei.
Ka dustur u Khasi ka long kaba la buh la seng ryng-kat ka niam ka rukom bad ka suit ka shor da ki longshuwa manshuwa. Bad kita ki dei ki Kñi rangbah. Ha ki por ba mynshuwa bym pat wan u phareng u kñi u donbor ha ïing kur bad ïingkmie. U donbor ruh ha ki khyndew ki shyiap. Ka ïing ka sem u Khasi ha shuwa ka jingwan u phareng, ka kynthup ïa u kni, ki para shynrang kynthei bad ki pyrsa. Ki ïathuh ba naduh u snem 1900 eiei u kñi u dang donbor ha ïingkur bad ïingkmie bad halor ka khyndew ka shyiap.
Hynrei mynta ka bor u kñi ka la duh bad la donbor ka khun khatduh kumba long mynta. Ki ïathuh ba dei u phareng uba la wanrah bad pynlong aiñ ba ka khatduh ka dei ban ïoh lut ïa ka nongtymmen bad ïa ki jingdon jingem jong ka kmie u kpa ruh.
U kñi ha ki por ba mynshuwa u donbor ïa ki kam ïing kam sem. Ka khatduh ka long tang ka nongsumar bad kam long trai bad kam lah ban leh katba ka mon, khlem ka jingïatip lang ka kmie u kpa ki hynmen bad u kñi. Kane ka long ka bor u kñi Khasi u bat ha ka por ba mynshuwa.
C. B. Iawphniaw
