Ngi ki briew ngim dondor watla ngi ïoh ïa kmen ïa sngewbha katno katno ruh hangne ha pyrthei. Ki don ki kam kiba pynsngewtynnad ïa ngi hangne ha pyrthei kum ka ïaleh kai phutbol, ïaleh kai kriket, ïa jngi ha ki thwei jong ki pung bad ki wah, ngi ïa shong lieng ha ki um, ngi ïa pynïamareh kulai, ngi ïa leit jingleit da ki Rel, ngi ïa shong eroplane ne liengsuiñ, ngi pynïalehkai sport, ngi ïa rwai kwaiar ha ki jingseng, ngi ïa rep lyng-kha ïa rep pynthor, ngi ïa thung kba, thung jhur, thung soh ïa rap tympew ïa rep kwai bad bun kiwei kiwei katba ngi dang im hangne ha pyrthei.
Baroh kine ki kam hangne ha pyrthei kim ju neh sah. Ki long tang ka rukom trei kam jongngi ki briew hangne ha sla pyrthei. Ki lah ban pynkmen bad pynsngew-bha shipor katba dang shai ka sngi bad ki pyndiaw pat ynda la dum bad la long ka miet ka wan.
Kiei kiei kiba ngi ki briew ngi leh ki long tang ban pynkmen shipor arpor ym shi jingim.Namar katba ngi dang khlain dang shait ngi lah ban leh ïa kine kiei kiei baroh. Hynrei ynda ngi la jam sha jinglong tymmen bad la noh ka rta kine baroh ki la kylla lip rong ha ka jingim hangne ha sla pyrthei. Namar ym lah shuh ban ïaleh kai lane ban rep ban riang ban ïa mareh thong kum ha ka por ba ngi dang samla lane dang khlaiñ dang shait. Kane ka pyrthei ka long ka ïing shong basa shipor bad hap leit phai noh shapoh dewmet sha lyndet ki lyoh. Ym don ba im sah hangne ha pyrthei. Ka rta u briew ka kut noh khlem lah ban sngewthuh. Kane keiñ ki ong ka jingkmen bad jingsngewbha ki long tang shipor.
C. B. Iawphniaw
