Shillong, K’lyngkot 24
Ka kynhun ïalehkai jong ka Meghalaya ki la hap ban da jaw syep bad syar mynta baroh shi sngi, ka sngi jong ka jingwan kylla artad jong ka samoi jong ka jingsdang ban beh ka lyer ha ka sngi kaba ar ka jingïakhun ka lympung ïalehkai ka Ranji Trophy 2024-25 Elite Group A pyrshah ïa ka Odisha ba la long ha madan MCA ha Polo.
Ha kaba kut jong ka sngi, ki rangïalehkai ka Odisha ki la muja bha ïa ka jingailad ka madan, ha kaba ki la lah ban kamai haduh 523 ron hadien ba ki la hap noh 7 wiket bad ban tam kylla ïa ka Meghalaya da 325 ron.
Kum ban shu phaidien sha kane ka jingïakhun, ka Meghalaya kaba la wan ban tied ïa ka pali ba nyngkong ka la ïoh tang 198 ron bad hap lut baroh wiket.
Haba phai biang sha ka sngi kaba ar, u Swastik Samal (80 run na 107 bol) bad u Shantanu Mishra (37 run na 88 tylli bol) ki la liem noh ha ki kti jong u Akash Kumar Choudhary bad bynrap lang sa lai tylli ki wiket ba la shim da u Md Nafees Siddique kaba shipor ka la pynlong ïa ka Odisha ba kan hap ar wiket na ka bynta 120 run.
Pynban shwa ba ki rang kawang bol ka Meghalaya kin lah ban teh ïa la u lakam, wan mih ka spah ron kaba 121 na ki 157 tylli bol na u Govinda Poddar bad bynrap lang da ka 78 ron na ki 100 tylli ki bol na u Sandeep Pattnaik, ka la seng pat ïa ka nongrim kamai ron kaba skhem bha ïa ka kynhun ïalehkai jong ka Odisha.
Ha shwa ba kine arngut kin bteng ban jam shakhmat, u Govinda u la ngat ha ka shrip jong u Wallambok Nongkhlaw ba la kem da u Sumit Kumar ha ki bynta ka long-off boundary. Hadien kane, u Kartik Biswas, u la lah ban kynjoh sha ka shiteng spah kata 68 ron na ki 85 tylli bol ha shwa ba un khyllem noh ha u Anirudh B.
Wat lada ki rang-ïalehkai ka Meghalaya ki la hap shisha ban ïakhun tyngeh, pynban ka la don kawei ka khyllipmat kaba jan lah ban pynkylla ïa ka dur ka dar jong kane ka jingïakhun, kane dei ka khep jong ka lynti ka hat-trick kaba u Hafees u la don ha shwa ba kane ka jingïakhun kan khreh ban jam noh sha kaba kut jong ka sngi, ïa kaba kam shym la lah ba kan urlong satia.
Ha baroh ki bynta jong ka jingwan ban bol, ki rang kawang bol ka Meg-halaya ki la lah ban bol tang 4 tylli ki maiden na baroh ki 108 over ba la ïalehkai mynta ka sngi, katba ka run-rate ka Odisha pat ka long 4.84 ron.
Da kumta, ka jing-ïakhun jong ka sngi ba lai kan dei ka thong bah thong san ïa ki nongtied ka Meghalaya la kin lah ne em ban ïai shan slem hapdeng jong ka jingïakhun.
