Mumbai, Kyllalyngkot:
Ka ïingbishar jong ka Mumbai, ha ka sngi Thohdieng, ka la pynjlan haduh ka 29 tarik, Kyllalyngkot, ïa ka jingset jong ki pulit ïa u runar uba na Bangladesh, uba la shah kem halor ka jingkynnoh ba u la dung da ka tari ïa u khlur ak phlim ka Bollywood u Saif Ali Khan ha ïingsah jong u ha ka por ba u thmu ban lute ha ka jingjia kaba la jia ha ka taïew ba la lah.
Ki pulit ki la ïalam ïa une uba la shah kynnoh, ba la tip kyrteng kum u Shareeful Islam Shehzad Mohammad Rohilla Amin Fakir (30) hakhmat ka Magistrate Court ha Bandra ha kaba kut jong ka jingshah set patok jong u kaba ha shwa.
Ki la dawa ïa ka rai ban ïoh set tam ïa u sa kumba 7 sngi na ka bynta ka jingtohkit na ka ïingbishar, ha kaba ïadei bad ka jingthmu ban wad bniah halor ki katto katne ki bynta ba donkam ban tip ha kaba ïadei bad ka mukotduma.
Ka ïingbishar ka la ailad ïa ka jingkyrpad jong ki pulit bad ka la pynjlan ïa ka jingset patok ïa u haduh ka 29 tarik, Kyllalyngkot.
U Khan, uba la shah kem na ka nongbah Thane kaba marjan, u dei u nong Bangladesh uba la pynkylla kyrteng sha u Vijay Das hadien ba u la wan rung be-aiñ sha India ha u snem ba la lah, ong ki pulit kham ha shwa.
