New Delhi, Kyllalyngkot:
U heh nongïalam jong ka seng Aam Aadmi Party (AAP) u Arvind Kejriwal ha ka Sngi U Blei u la pynbna ba u Manish Sisodia un shimti biang ïa ka kam kum u Symbud Myntri Rangbah lada jia ba ka seng kan ïoh ïa ka jingjop ha ka jingïakhun ïa ka ilekshon Assembly ha Delhi ha ka 5 tarik, Rymphang.
U Arvind Kejriwal u la pynbna ïa kane ha ka jingïalang paidbah kaba la long ha Jangpura konstitwensi, ha kaba u Manish Sisodia u ïakhun mynta ka kynti.
“Un sa long u Symbud Myntri Rangbah ha ka sorkar, bad ryngkat bad u, phi baroh phin sa long ruh ki Symbud Myntri Rangbah,” la ong u Arvind Kejriwal ha ka jingïalang, ha kaba u la kyntu ïa ki nongthep vote ban jied ïa u Manish Sisodia.
U Manish Sisodia, uba la shakri ïa ka kam kum u Symbud jong u Arvind Kejriwal ha ki bynta ba bun jong ka sorkar AAP ba la leit, u la shahkem ha u bnai Lber 2023, ha kaba ïadei bad ka mukotduma jong ka Delhi Liquor Excise Policy.
U dei u MLA na Patparganj, hynrei u ïakhun ïa kane ka ilekshon Assembly na Jangpura. U Arvind Kejriwal u la kynthoh ïa ki MLA ka BJP halor ka jingkynnoh ba ki khanglad ïa ka roi ka par ha ki konstitwensi jong ki ha kane ka jingïalang.
“Ha ka por ba la leit, ki MLA ka BJP ki la jop ha ki 8 tylli ki Assembly konstitwensi. Kim shym la ailad ba kano kano ka kam kan ïaid ha ki jaka jong ki. Baroh 8 ngut ki la pynlong ïa ka dorbar jong ki kum ka dujok kaba im. Phi ki paidbah phim dei ban leh bakla kum kane,” u la ong ha ka jingïalang.
Haba pynpaw ïa ki jingnoh synñiang jong u Manish Sisodia, u Arvind Kejriwal u la ong, “Nga bad u Manish Sisodia ngi la pynlong lang ïa ki skul sorkar kiba bha tam na ka bynta ka lawei kaba bha jong ki khun jong phi. Mynta ka BJP ka ong ba lada thaw ïa ka sorkar jong ki, kin khang lut ïa ki skul sorkar hangne ruh. Ka shong haphi ban jied ïa ka “AAP– ‘kaba tei ïa ki skul sorkar’ — lane ïa ka BJP, ‘kaba khang ïa ki’.”
Haba kren sha ki nongthep vote ha Jangpura, u Sisodia u la kular ïa ka jingsynshar kaba pynkylla lada nga shah jied. “Lada nga jop na Jangpura, uwei pa uwei u hynmen bad ki para hangne kin long Symbud Myntri Rangbah. Ym don mano mano ruh ban nud ban khanglad ïa ka kam jong ki briew hangne,” u la ong.
Ka AAP, ka ïakynduh ïa ka jingïakhun kaba tyngeh ha Jangpura, ha kaba ka BJP kan pynïeng ïa u Tarvinder Singh Marwah bad ka Congress kan pynïeng ïa u Farhad Suri. Ïa ki nongjop ha ka ilekshon Assembly yn pynbna ha ka 8 tarik, Rymphang.
