Nongpoh, K’lyngkot 29
San ngut ki kyrtong jong ka Voice of the People’s Party (VPP) na ki san tylli ki konstitwensi ka Ri Bhoi District, ki la pyndep ïa ka jingleit thep kyrteng ïalade ha ka Sngi Balang ha ophis jong u Deputy Commissioner ka Ri Bhoi ha Nongpoh ban ïa aireng ha ka ilekshon MDC ka ban long ha ka 21 tarik u Rymphang, 2025.
Kine san ngut kyrtong ka VPP kiba la thep kyrteng ki long u Bah Mathew Keneth Makdoh na Nongpoh konstitwensi, u Bah Isynei Hinge na Umroi konstitwensi, u Bah Apkyrmen Lyngdoh na Jirang konstitwensi, u Bah Banrikus Nongsteng na Umsning konstitwensi bad u Bah Kynjohlang Rangtong na Mawhati konstitwensi.
Haba kren sha ki lad pathai khubor hadien ba la dep thep kyrteng, u Bah Mathew Keneth Makdoh bad u Bah Isynei Hinge ki la pynpaw ba ki don jingkyrmen ban ïoh ïa ka jingjop bad ka thong ka jong ki kum ki kyrtong ka VPP ka long ban wanrah ïa ka synshar-khadar kaba beit, ka synshar-khadar kaba khuid, kaba hok bad ka bym ïashah liang bad ban pynkhuid ïa ka jingbamsap hapoh ka KHADC bad ka jylla hi baroh kawei kumba ka seng ka la dep ban ai ïa ka jingkular sha ki paidbah.
