Shillong, Rymphang 03
Ka National Games Technical Conduct Committee (GTCC) ka la bujli ïa u director jong ka jingïalehkai Taekwondo hadien ka jingkynnoh ba u pynbeit lypa ïa ka jingïalehkai (match fixing) pyrshah ïa ki katto katne ki heh official ha ki 10 jong 16 tylli ki kyrdan jingkhia shwa ba ka jingïalehkai kan sdang.
Ha ka jaka jong u T Praveen Kumar la bujli da u S. Dinesh Kumar kum u director ba thymmai ba kynthup lang ïa lai ngut ki dkhot hapoh ka Prevention of Manipulation of Competition Committee (PMCC) jong ka 38th National Games.
“Ka long kaba kongsan ba ngin shim khia ïa ki jingai jingmut jong ka PMC Committee bad ban ïada ïa ka jinglong ba janai jong ka National Games Uttarakhand,” la ong ka chairperson ka GTCC ka Sunaina Kumari ha ka Lah Sngi U Blei.
“Nalor ba ngi la ïoh jingujor pyrshah ïa u nongpynïaid barim jong ka jingïalehkai, ngi la sngewlyngngoh ruh ban lap ba u la jer kyrteng ïa ki nongkitkam bad ki dkhot jong ka komiti treikam jong katto-katne ki synjuk ïalehkai ki jylla bad kumjuh ïa uwei uba la long u nongdie tiar na ka bynta ki jingpyrshang jied kum ki nongtrei mon sngewbha ba kyrpang na ka bynta ki jingïalehkai, ” ka la bynrap.
Na ka liang ka President jong ka Indian Olympic Association (IOA) ka PT Usha ka la kyrshan ïa kane ka sienjam da kaba ong ba ka long kaba kongsan ïa baroh ki nongïashim bynta ban pynneh ïa ka mynsiem ïalehkai bad ban ailad ïa baroh ki nongïalehkai ban pyni ïa ka sap jong ki ha kane ka lympung kaba heh duh jong ka ri.”
“Ka long kaba sngewlyngngoh bad sngewsih ba ïa ki takma National Games la kynnoh ba la rah jngai na madan ïalehkai wat shwa ban sdang ki jingïalehkai,” la ong ka Usha.
“Ha ka IOA, ngi shim khia ban long kiba khuid ha ka baroh ki nongïalehkai jong ngi bad ban ïada ïa ki na ki briew kiba shukor ban pynkhihwin ïa ka jingïalehkai bad ban pynsniew ïa ka dur jong ka National Games,” ka la bynrap ha ka kyrwoh.
