Aizawl, Rymphang:
U Myntri Rangbah ka Mizoram, u Lalduhoma, un wanrah ïa ka mang tyngka jong ka jylla na ka bynta u snem mang tyngka 2025-26 ha ka ïingdorbar jong ka jylla ha ka 4 tarik Lber, ong uwei u heh ophisar, ha ka sngi Thohdieng.
Ka dorbar mang tyngka, kaba dei ruh ka dorbar kaba saw jong kane ka ïingdorbar kaba mynta hapoh ka jingsynshar jong ka Zoram People’s Movement (ZPM) kan sdang ha ka 19 tarik u Rymphang.
Ka Commissioner bad ka Secretary jong ka ïingdorbar jylla ka Vanlalthantlingi ka la ong ba ka jingïalang jong ka Business Advisory Committee (BAC) ba la pynïaid da u Lamphang ka ïingdorbar u Lalbiakzama ha ka sngi Balang ka la wanrah ïa ka prokram kaba bniah bad rai ba ka dorbar kan bteng haduh ka 20 tarik, Lber.
Katba u Lat ka jylla u General Vijay Kumar Singh un ai ïa ka jingkren kum u Lat ba nyngkong jong u ha ka ïingdorbar ha ka sngi kaba nyngkong jong ka dorbar, u Lalduhoma uba bat ruh ïa ka tnad pla tyngka un wanrah ïa ka mang tyngka jong ka jylla na ka bynta u snem mang tyngka 2025-26 ha ka 4 tarik, Lber, ka la ong.
Kane kan dei ka mang tyngka kaba ar ba u Lalduhoma u la wanrah hadien ba ka Zoram People’s Movement (ZPM) ka la wan ha ka bor ha u bnai Nohprah, 2023.
U Myntri Rangbah u la wanrah ïa ka mang tyngka kaba khlem tam na ka bynta u snem mang tyngka 2024-25 ha ka 27 tarik, Rymphang, jong u snem ba la lah.
Ka Vanlalthantlingi ka la ong ba ka Assembly Secretariat ka dang hap ban ïoh ïa ka bill sorkar, ka jingkylli kaba la buh bad ka jingkylli kaba khlem pat wanrah ban wanrah hapoh ka ïing dorbar thawaiñ ka jylla ha kane ka dorbar mang tyngka ban wan.
