Mih ki jingïakynad sa ha khappud Manipur bad Myanmar

Ka jingïasiat kaba jur ka la jia ha ka thaiñ Sagaing jong ka Myanmar - ka ri kaba don hapdeng ka thma pohïing - ha ka 27 tarik, Kyllalyngkot.

Imphal, Rymphang:

Hapdeng ka jingjai-jai jong ki jingïakynad bad ki kam thombor ha Manipur, ki bor pahara ki la shah pyntreikam ha ka jingpynkhreh kaba khlaiñ namar ki jingïasiat bad ki jingbthei bom kiba la jia hajan u pud u sam jong ka jylla bad ka Myanmar ha kine ki taïew ba la dep.

Ka jingïasiat kaba jur ka la jia ha ka thaiñ Sagaing jong ka Myanmar – ka ri kaba don hapdeng ka thma pohïing – ha ka 27 tarik, Kyllalyngkot.

U Superintendent of Police jong ka Kamjong, u Ningshem Vashum, u la ong ba ka jingïasiat ka la bteng hajan khappud. “Ki jingïasiat ki dang bteng hynrei sha shiliang pud, hapoh ka jingpeit jong ka Myanmar. Ngi don ha ka jingpahara kaba khlaiñ,  ryngkat bad ki shipai Assam Rifles, ngi la plie lai tylli ki jaka khynra thymmai ha shilynter u khappud – naduh Namlee haduh Phaikok. Mynta, kam don kano kano ka jingkyntur pud kaba jia ha kane ka bynta, bad kam don kano kano ka jingkylla na ka liang jong ngi”, u la ong.

Namar ba ka jingkulmar ka jia sha shiliang khappud, ki heh na ki bor pahara kiba la buh ban pyntreikam ha Manipur ki la ong ba kim don jingtip kaba bniah shaphang kino ki kynhun kiba donkti ne katno ngut ki mynsiem briew ki la duh ei. Hynrei ha ka taïew ba la dep, lai tylli ki kynhun lehnoh bapher bapher kiba la shah ñiew beaiñ na ka them jong ka Manipur, kaba bun ki Meitei, kiba don ktem ha Myanmar, ki la kam ba ki shipai jong ki, ki la shah pynïap ha ki jingïasiat ba markylliang.

Ha ka 31 tarik u Kyllalyngkot, la pynlong ïa ka jingleit ontep paidbah ha ka thaiñ Andro jong ka Imphal East ban burom ïa uwei u dkhot jong ka kynhun ba la shahñiew beaiñ jong ka People’s Liberation Army (PLA), uba la shah pynïap ha Myanmar, hajan khappud, ha ka 27 tarik u Kyllalyngkot.