Imphal, Lber:
Ki bor pahara ha ka thaiñ Wakan jong ka Manipur, ki la buh ha ka jingpahara kaba jur, hadien ka jingsiat suloi ha ka Kongba Maru Temple, kaba thmu ban pynthut ïa ki jingleh niam jingduwai. Ki bor pynïaid ki la pynlong ïa ki kam kiba jur ban pynïoh biang ïa ka jingsuk bad ban kem ïa kiba donkti.
Hadien kane ka jingjia, la pynpoi mardor ïa ki bor pahara sha katei ka jaka bad ki sawdong sawkun jong ka, da kaba pynkhuid ïa ki jaka, bad ki jingkhynra ha kylleng ka Wakan Ridge bad Mark Hills Ridge. Ki heh sorkar ki la khot ruh ïa ki nongmihkhmat jong ka Kuki Inpi-Saikul bad ki nongsynshar shnong na ki shnong Kuki kiba don marjan, da kaba pynmih ïa ka jingmaham kaba tyngeh pyrshah ïa kino kino ki jingpynthut kiba kham jur. Ki bor pynïaid ki la ban jur ba yn shim khia da kaba tyngeh lada kum kine ki jingjia ki jia biang.
Ka jingpyrshang ka dang ïaid shakhmat ban lap bad kem kloi ïa ki nongleh kam sniew. La bthah ïa ki bor pahara ban pynneh ïa ka jingpeitngor kaba jur bad ban jubab bha ïa kino kino ki jingpynkheiñ aiñ ha ki por ban wan, ban pynthikna ïa ka jingsuk bad shongsuk-shongsaiñ ha ka thaiñ.
Ha kajuh ka por, ki bor pahara ki la ïathuh ba kitei ki saw ngut kiba la shah kem ha ka sngi Thohdieng ha Kangpokpi distrik ki dei kiba donkti ha ki kam dawa pisa ha shi lynter ka surok Imphal-Dimapur (NH-2), ha kaba ki la kem ïa saw ngut ki briew na Bimparao ha Kangpokpi district. La iathuh ba ki dei kiba treikam hapoh u dkhot jong ka kynhun ba la soi ïa ka Suspension of Operations (SoO) ka Kuki National Front (P), ong ka kyrwoh khubor.
