U Nongsaiñ Hima, 1979
Ha ka synshar paidbah ka long kaba donkam eh ban don ar ki liang, ka liang kaba bat ïa ka bor synshar bad ka liang kaba ïeng ban kdew ïa ka lait ka let ne ïa ka jinleh thombor ka liang kaba bat ïa ka bor synshar. Kumjuh kumba don kam artylli ki mawshamok kiba lada kyrshut ïa ki ki pynmih ka ding, kumta ruh ha ka synshar paidbah donkam ïa kine ki artylli ki liang kiba ïa kyrshut ban pynmih ka ding jong ka jingbha, ka jingïaid shaphrang bad ka jingroi jingsan jong ka jaidbynriew.
Ha Bilat, ïa u nongïalam jong ka liang pyrshah la siew tulop bad ka tulop jong u ka long kaba heh la kat ka jong u Myntri Rangbah uba long u nongïalam jong ka liang kaba bat ïa ka bor synshar. La leh khnang ïa kane ba kan wanlam ïa u soh ka jingbha da ka jingwohñia, da ka jingkdew jong u la ki kam jong ka liang ba bat ïa ka bor synshar.
Kane hi ka pyni bad pynsakhi ruh ïa ka jingdonkam ba dei ban don ka liang kaba dei ban ïa pyrshah ka ban ïarap pynbeit ïa ka liang sorkar. Lymda ka long kumne ka synshar paidbah kam don jingmut ei ei bad kan shu long ka synshar lahduh.
Ha kum kata ka synshar lahduh ngi la iohi kumno ba ïa ka ri Germany la pynïaid ha ka por jong u Hitler bad kumno ruh ïa ka ri Italy la pyniaid da u Mussolini ha ka por thma ba la dep. Ka ri Russia ruh lah ban ong ba ka dei ka Seng jong ki ka long kaba lah duh bad kaba donbor palat ban ïano ïano. Ngi la iohi ïa ki jingmih na kum kine ki jaid sorkar bad kawei kaba kongsan eh ka long ba ka jinglaitluid jong u briew ha kum kita ki ri, kam don bad kumta ka pyrkhat pyrdain jong u briew kam roi kam san kumba ka long ha kito ki ri kiba don ka synshar paidbah.
Ha ka synshar paidbah dei u paidbah uba bishar ban jied ïa la ki nongïalam bad nongmihkhmat la jong ha man la ki san snem. Dei u paidbah uba long u Nongbishar ha man la ki 5snem ban bishar ïa la ki nongmihkhmat ba aiu ki la leh bad trei na ka bynta ka jing-bha bad jingroi jong u paidbah bad jong ka ri.
Lada u paidbah u long uba shemphang bad sngewthuh khlem pep ka rai jong u kaba long ha ka dur jong ka jingleit thep vote kan phalang ha ka jingjied bad jingrem jong ki nongïaleh. Hynrei lada u paidbah um nang bad um shalak ba iano un jied bad ïano un ym jied ka jingmih kam long ba ka synshar paidbah kan long tang ka kynja pung ktieh ka ban pynroi sa tang ïa ki khniang jingpang.
Donkam namarkata ba ngin puson bad ngin ïa wad lad ban tip kham bniah ba aiu ka synshar paidbah ka mut bad kaei ka jingthmu jong kum kata ka rukom synshar bad halade ngin khan ngin pyrkhat namar ba ka Mynta bad ka Lawei jong ka ri bad ka jaidbynriew ka shong ha ka kti jong ka pateng kaba mynta.Lada kum ka jaidbynriew ha kane ka soah snem kaba 20 ngin ym kit khia ban lap ban wad ïa ka tynrai bad jingshisha ngin ym lah ban kynnoh pop ïano ïano hynrei ïa ngi hi keiñ.
