Chennai, Lber:
Ka kynhun Enforcement Directorate (ED) ha ka Sngi Palei ka la pynlong ïa ka jingkhynra ha ki jaka bapher bapher kiba don ha Tamil Nadu ha kaba ïadei bad ka jingtohkit bathymmai halor ka jingpyntreikam beaiñ ïa ka pisa kaba long pyrshah ïa u Myntri Senthil Balaji bad kiwei kiwei kiba don jingïadei bad ki jingkynnoh bym thikna ha ka Tamil Nadu State Marketing Corporation kaba donbor marwei halor ka kam khaïi kyiad ha ka jylla.
Ki kynhun ED ki la pynlong ïa ka jingleit khynra haduh 10 tylli ki jaka ha Karur bad kiwei kiwei ki jaka.
Ki pulit jong ka Central Reserve ki la leit ryngkat bad ki ophisar jong ka tnad sorkar pdeng.
Ka Supreme Court ka la ai jamin ïa u Balaji ha u bnai Nailur 2024 ha ka mukotduma ba kyrpang jong ka jingpyndonkam bakla ïa ka pisa ha kaba ïadei bad ka jingkynnoh ba don ki jingleh bymsuitñiew ha ka jingpynrung kam ha ka tnad Transport jong ka jylla. La thung biang ïa u Balaji kum u Myntri jong ka bording, ka jingkhang, bad ka khajna hapoh lai sngi hadien ba la ïoh jamin.
U la bat ïa kajuh ka kam naduh u bnai Jymmang 2011 haduh u bnai Jylliew 2023 shwa ba un shah kem.
Ha ka mukotduma ba mynshwa jong ka, ka ED ka la kynnoh ba ki jingbym ïaid beit ki la jia ha ka tnad Transport jong ka Tamil Nadu ha ka por ba u Balaji u dang long Myntri ka tnat Transport hapdeng u snem 2011 bad 2015 ha ka sorkar All India Anna Dravida Munnetra Kazhagam.
Ka tnad sorkar pdeng, kaba ka sorkar jylla ka kynnoh ba ka pynïaid ïa ka mukotduma thok na ka bynta ki daw saiñ pyrthei, ka la kynnoh ha ka mukotduma jong ka, kaba la mudui ha u snem 2023, ba u Balaji, u la pyndonkam bakla ïa ka bor treikam kum u Myntri ka tnat kit marbam, na ka bynta ka jingmyntoi shimet, lyngba ki lad bamsap bad ki lad ki lynti kiba be-aiñ. “U la ïoh beit beit ïa ka pisa be-aiñ kaba mih na ki kam runar kiba ïadei bad ki kam runar ba la buh por bad u la ïatreilang bad ki para ba ïatreilang, kynthup ïa u hynmen jong u, ki nongïarap shimet bad ki heh na ka tnad kit mar, ban thaw ïa kane buit sniew.”
