Imphal, Lber:
La pynlong ïa ka Training-cum-Orientarion Programme kaba shi sngi ha Conference Hall jong ka Kakching Municipal Council halor ka National Tobacco Control Program (NTCP) bad ka Cigarettes and Other Tobacco Products Act (COTPA), 2003.
Ïa kane ka jingïalang la pynlong da ka District Health Society (DHS) hapoh ka jingpeit jong ki bor pynïaid District, Kakching.
U Dr. Takhellambam Jullon, District Nodal Officer, NTCP, DHS Kakching, u la batai shai ïa ka jingsniew jong u duma ha ka liang ka koit ka khiah, da kaba ban jur ïa ka bynta jong u ha kaba wanrah ïa ka jingpang bampong, jingpang klong snam, jingpang ha ki bor ring bad pynhiar mynsiem, bad jingpang shini.
U Premjit Thokchom, Co-founder bad President jong ka Sangai Youth Tobacco Free and Educational Organisation u la ïakren halor ka jingsniew ha ka imlang-sahlang bad ka ïoh ka kot na ka jingdih duma.
U Sougaijam Surendro, Food Safety Officer, u la batai bniah halor ka COTPA Act, 2003, da kaba pynksan ïa ki kyndon jong ka ha kaba ïadei bad ka jingkhang ïa ki jingpynbna halor u duma, ban pyrkhing ïa ka jingdih duma ha ki jaka paidbah, bad ban khang ban die ïa u duma sha ki khynnah kiba dang rit ka rta.
Ha kane ka prokram la ïashim bynta kumba 40 ngut ki heh na ka tnad Medical, Food Safety, Police, bad ka pule-puthi. La sam ruh ïa ki kot Challan ban pyntreikam ïa ka COTPA Act sha ki heh sorkar.
