Imphal, Lber:
Ka jinglong jingman ha Churachandpur distrik jong ka Manipur, kaba la shah pynjari da ka Curfew ka la kham jai-jai ha ka sngi Palei, arsngi hadien ba la jia ka jingïakynad hapdeng ka kynhun jaitbynriew Hmar bad Zomi ha kaba la don uwei u briew uba la ïap bad bun ngut ki la mynsaw, la ïathuh ki pulit.
Ki skul bad ki dukan ki dang khang, katba ki nongïalam niam bad ki kynhun ba trei na ka bynta ki paidbah ki la trei shitom ban wanrah ïa ka shongsuk-shongsaiñ, la ïathuh u heh pulit ha ka jingïakren bad ki nongthoh khubor. Ki shipai ki la pynlong ïa ka jingïaid pahara ha ka miet jong ka sngi Balang ban khanglad ïa kino kino k jingïakynad.
Uwei u briew ïa uba la tip kyrteng kum u Lalropui Pakhuangte uba 51 snem ka rta uba dei na ka jaitbynriew Hmar u la khlad noh ha kane ka jingïakynad kaba la jia ha ka miet jong ka sngi Ba-ar. U la mynsaw na ka jingde jong ki kuli bad la pynkit ïa u sha Sielmat Christian Hospital, ha kaba ki nongsumar ki la pynbna ba u la khlad noh.
Kane ka jingïakynad hapdeng kine ki ar kynhun ki jaitbynriew ka la sdang hadien ba u General Secretary ka Hmar Inpui u Richard Hmar u la shah thombor ha ki katto katne ki briew kiba dei na ka jaitbynriew Zomi ha ka sngi U Blei, kaba la wanrah ïa ka jingïakynad bad pynjari ïa ka pakhang shnong ha ka distrik ha ka sngi kaba bud.
Ki la don kumba katto katne ngut ki briew kiba la shah pynkynriah na ka kynhun Kuki sha ki jaka sah ba shipor kiba lait na ki jingap jingma bad kiba don jingshngaiñ. Ka sor Churachandpur ka dei khamtam eh ka jaka sah jong ki jaitbynriew Zomi, ha kaba ki jaitbynriew Hmar bad Kuki ki shong ha ki katto katne ki thaiñ.
Hadien katto katne kynta ba la pynjari ïa ka jingkhot pakhang kaba thymmai da kawei ka kynhun ki samla pule ha Churachandpur distrik ha ka sngi Balang, ka kynhun jong ki MLA bad ki seng riewlum ki la kyrpad kyrpang ban ïoh ïa ka jingsuk.
Ha ka jingpynbna lang, ym duna ïa ka 12 tylli ki seng Kuki-Zomi bad Hmar kiba don ha Churachandpur distrik ki la khot ïa ka jingsuk hapdeng ki jaitbynriew bad mynjur ban thaw ïa ka komiti ban wanrah jingsuk ba ïatreilang ban buddien ïa ka jinglong jingman bad ban khanglad ïa ka jingbym ïasngewthuh jingmut ha ki por ban wan .
Ki 6 ngut ki MLA na Churachandpur bad Pherzawl distrik ki la pynmih ruh ïa ka jingkyrpad lang na ka bynta ka shongsuk shongsaiñ, da kaba kyntu ïa ka bor synshar ban shim ïa ki lad ki lynti ban wanrah biang ïa ka suk ka saiñ.
Kaba kham pynsah kynmaw ka long ba palat 250 ngut ki briew ki la shah pynïap bad da ki hajar ngut ki la sah khlem ïing khlem sem ha Manipur ha ka jingïakynad hapdeng ki kynhun Meitei bad ki kynhun Kuki-Zo naduh u bnai Jymmang, 2023.
Ka sorkar pdeng ka la pynjari ïa ka jingsynshar President ha kane ka jylla ha ka 13 tarik u Rymphang hadien ba u N Biren Singh u la iehnoh ïa ka kam kum u Myntri Rangbah ka jylla. Ka ïingdorbar ha ka jylla kaba don ïa ka samoi treikam haduh u snem 2027, ka la shah pynsangeh shwa shipor.
