Ka jingjied ka Meghalaya High Court ban thung ïa u Justice (Retd) B. P. Katakey napdeng kiwei pat ki Justice ba la shongthait, ka long da ka jingtip bad jingsngewthuh kaba biang ba u long u briew uba shemphang, ba beit bad ba hok.
Ki sengbhalang bad ruh ki paidbah kim pat kwah ban pynkut noh ïa u kum u khlieh duh jong ka Committee ban tohkit. Nga ngeit ba ka rai jong u Nongtih Dewïong beaiñ, ka la pynsmiej bad pynmih ‘Niangkhriat ïa ki hehspah kiba kamai bymhok.
Kan pynpeitmat ïa ka jingmatlah jong ki bad kata ka long ba kin hap thied ym shuh ïa ki krem hynrei ïa ki Lumbah na shajngai. Kin hap ban pynkhyllem bad pynmadan bun tylli ki Lumbah. Kin hap kit ïa ka khyndew, Mawbah Mawrit ban tep biang ïa kita ki thliew khnai ba jylliew shaduh trai ki wah kum ka wah Umïam, Wahkhri, Wah Myntang, Wah Waikhyrwi, Wah Lukha bad lehse wat ïa ka Wah Umngot. Ngin ïa khmih lynti ba ka rai kaba bud jong u Justice Katakey kan long ba kin hap ban thung bun bah ki jait dieng ban pynlong khlaw biang ïa baroh ki lum ba ki la dep ban pynjujor. Sa shisien pat, namar jongphi kin win ki khlaw sa shisien pat kin khih ki maw.
G. B. Blah
