To ngin ïa peit ïa ka jingkordor u symbai lada dei ïa u symbai briew, ne u symbai mrad ne u symbai ki jhur ki khep. U symbai u long uba lah ban pynmih pateng la pateng ïa uta u dieng ne u soh. Kum ka nuksa u symbai riewmadan um lah ban kylla rynsun da lei lei ruh. U symbai tyrso um lah ban kylla piat da lei lei ruh. Kumjuh u symbai ba ïoh na u phareng u mih hi u symbai khun lieh kum u kpa phareng. U symbai na u kpa Negro un mih hi u symbai khun iong kum u kpa Negro.
U Symbai Nepali un mih hi u khun kum u kpa Nepali bad kumta ter ter. Katba ha ngi ki Khasi – pnar ïa u symbai ioh kpa phareng lah ban khot da ka jait Khasi ïa u. Ha ka jingshisha ïa u khun phareng ym lah ban pynkylla jait sha ka kmie Khasi. Kumjuh ïa u symbai soh Apple ym lah ban pynkylla kum u symbai sohniamtra ha ka jingshisha dei ban pynneh pynsah ïa u symbai Khasi paka ym ïa ka jait ka kynja.
Tangba yn leh kumno ngi ki Khasi ngi kheiñ kor ïa ka jait ka kynja ban ïa u symbai u rnai. Kumjuh ha ngi ki Khasi lada kum u kpa nga dei na ka jait ‘A’ bad ka tnga ka dei na ka jait ‘B’. Te ki khun ha ka jingshisha ki dei ban shim na ka jait u kpa ym na ka jait ka kmie namar ki khun ki dei u symbai ba ïoh na ka jait u kpa.
C. B. Iawphniaw
