New Delhi, ïaïong:
Ka National Investigation Agency (NIA) ha ka sngi U Blei, ka la kem ïa uwei u snar uba la shah kynnoh ba u donkti ha kaba phah beaiñ ïa uwei u briew sha US lyngba ka lynti kaba pawnam jong ka “dunki”.
Ka kyntien “dunki”, kaba la ngeit ba ka mih na ka kyntien “kadda”, ka thew ïa ka lynti be-aiñ kaba ki nongwan buhai shnong ki shim ban rung sha ki ri kum ka ri America khlem ki kot ki sla kiba biang.
Ka jingleit jingwan kaba don jingma bad kaba eh jong ki, ka ju long kaba la pynsuk da ka kynhun khaïi briew.Uba shah kynnoh, u Gagandeep Singh, uba la tip kyrteng kum ka Goldie, uba shong ba sah ha Tilak Nagar, ha shathie jong ka Delhi, u la shah kem ha ka kynhun NIA, ong ka kyrwoh khubor.
La kynnoh ba ïa ka Goldie la siew kumba 45 lak tyngka da uwei u nongshah pynïap na ka distrik Tarn Taran jong ka Punjab na ka bynta ka jingwan rung be-aiñ, ong ka khubor. ?
Ïa une u lanot la phah sha US lyngba ka lynti “dunki” ha u bnai Nohprah jong u snem 2024, ong ka kyrwoh ba la pynmih da ka kynhun NIA.
La beh noh ïa u sha India da ki bor synshar jong ka US ha ka 15 tarik u Rymphang bad hadien kata u la ujor pyrshah ïa u “agent” ba la shah kynnoh. Ïa kane ka mukotduma la buh jingthoh nyngkong da ki pulit ka Punjab bad hadien, la shimti noh da ka kynhun NIA ha ka 13 tarik u Lber.
Ka jingtohkit jong ka NIA, ka la pynpaw ba ka Goldie, ka bym don satia ïa ka laisen lane ka jingbit aiñ lane ka jingpynrung kyrteng na ka bynta ban phah ïa ki briew shabar ri, ka la pyndonkam ïa ka lynti kaba “dunki” bad ka la phah ïa utei u lanot sha US lyngba ka Spain, El Salvador, Guatemala bad Mexico.
“Ki Donker/ki paralok jong ka Goldie ki la shoh bad pyndonkam bakla wat ïa u lanot, nalor ba ki la knieh ïa ki pisa dollar kiba u rah, ha ka jingleit jingleit kaba ïakynduh jingeh, ki jingtohkit jong ka kynhun NIA ki la pynpaw shuh shuh,” la ong ka kyrwoh khubor.
Haba jubab ïa ka jingkylli ha Lok Sabha, u Myntri ka sorkar kmie uba dei khmih ïa ka tnat korbar ri u Kirti Vardhan Singh u la ong, ha ka 28 tarik u Lber, “Naduh u bnai Kylalyngkot 2025 haduh mynta ka sngi, baroh ki don 636 ngut ki nong India kiba la shah beh sha India na US.”
