New Delhi, ïaïong:
Katkum ka jingïohlum khubor, la ong ba ka la don ka jingpynkheiñ ïa ka aiñ sangeh ïasiat ha shi lynter jong u Line of Control (LoC) ha ka thaiñ Poonch jong ka Jammu bad Kashmir, ha kaba la ïathuh ba ki la don ki jingsiat khlem daw bad ka jingwan hiar thma jong ki shipai Pakistan.
U Lieutenant Colonel Suneel Bartwal kum Ophisar ba dei peit bad ki paidbah jong ka Army, u la ong ha ka sngi Balang ba ki shipai India “ki la jubab bha ha ka rukom ba la tehlakam bad pynbeit ryntih.”
Hadien kane la bud sa ka jingsiat khlem daw bad ka jingpynkheiñ ïa ka sangeh ïasiat da ki shipai Pakistan,” ong u Bartwal. Kawei pat ka tyllong khubor ka la ïathuh ba ka la don ka jingmynsaw na ka liang ka Pakistan, hynrei ym shym la don kano kano ka jingïap na ka liang ka India. U Colonel Bartwal u la ban jur ruh ba ki shipai India ki la pynpaw biang ïa ka jingdonkam ban bat ïa ki nongrim jong ka jingïasngewthuh jingmut hapdeng ki Director General of Military Operations (DGMO) jong kine ki ar tylli ki ri, ban pynneh pynsah ïa ka jingsuk ha shi lynter u Line of Control.
Ka jinglong jingman ka la kylla shibun naduh u bnai Rymphang, 2021, ha kaba ki DGMO jong ka India bad Pakistan ki la pynpaw biang ïa ka jingkular jong ki halor ka jingïateh kular sangeh thma jong u snem 2003, kaba pynthikna ha ka jingshisha ïa ka jingsuk ha shilynter ka khappud.
Ka India ka ïasamlang ïa u pud u sam uba jrong 3,323 km bad ka Pakistan, ïa kaba la phiah ha ki lai bynta, kata ka International Border (IB), kumba 2,400 km na Gujarat haduh ki rud ba Shatei jong ka wah Chenab ha Akhnoor, Jammu; u Line of Control (LoC), uba jrong 740 km, uba ïaid na ki bynta jong ka Jammu sha ki bynta jong ka Leh; bad u Actual Ground Position Line (AGPL), uba jrong 110 km, uba pynïabynta ïa ka thaiñ Siachen naduh NJ 9842 haduh Indira Col shaphang Shatei.
