Ka jongno kaba dei ka jongno ka bym dei, to ïa tih bniah ïa ka daw ban pynshong nongrim ïa ka ai jait kmie bad ka ai jait kpa. Ha ngi ki Khasi don kiba ong ba ka ai jait kmie ka dei ka tynrai ba ai u Blei ïa ka jaitbynriew Khasi, ka dustur jongngi ki Khasi ka dei ka dustur Blei, namar ka kmie ka long kum ka Blei.
Kane ka lah ban long ba u Blei u thaw nyngkong ïa ka kynthei ha ngi ki Khasi. Ki ong ruh ba ka jait jong ka kmie la ñiew kyntang haduh katta katta lyngba ka niam ka rukom, ka duwai ka phirat, ki da pan ban ïoh bor na u kynrad (Blei). Ka kmie shisha ka dei ka Blei ha pyrthei namar dei ka kmie ba pun ba kha. Ki ong ba dei ka kmie kaba saiñdur ïa ka longiing longsem, ïa ka akor ka burom ka tipbriew ka tipblei bad ïa ka tip kur tip kha.
Katba ha ka dustur ki Jiw ne Israel ka jait kpa lane u shynrang ka long kaba la ai da u Blei naduh sdang long ka pyrthei. Kumta u Blei u la thaw ïa u briew ha ka dur jong u hi. Namar u Blei u la thaw nyng-kong ïa u shynrang kumta ïa ka jait ki shim na u shynrang (kpa) katkum ka Baibl, te u Trai uba u Blei u la ong ruh, ym bit ba uta u briew un sa marwei un thaw ïa u ka nongsumar lem kaba biang, kumta U Trai uba u Blei u la pynngat ha u Adam u briew uba nyngkong da ka jingsamthiah kaba jur bad u la shim ïa kawei na ki shyieng krung jong uba u la set pat da ka doh ha ka jaka jong ka.
U Trai uba u Blei u la pynlong ka briew na kata ka shyieng krung ïa kaba u la lah shim na uta u briew. U Adam uba long u briew uba nyngkong u la ong kane mynta shisha ka long ka shyieng na ka shyieng jong nga bad ka doh na ka doh jong nga ïa kane keiñ yn khot ka Briew, namarba la shim ïa ka na u briew. Kumta ki Jiw ki kheiñ bad shim ïa ka jait na u shynrang namar ki ngeit ba u Blei u la thaw nyngkong ïa u shynrang.
Ngi ki Khasi pat ngi shim jait sha ka kynthei namar u Blei u thaw nyngkong ïa ka kynthei ym kum kiwei ki jaitbynriew ka pyrthei ki shim jait na u shynrang namar u Blei u la thaw nyngkong ïa u shynrang. Kane ka long ka jingïapher ha ka rukom shim jait jongngi ki Khasi bad kiwei ki jaitbynriew ka pyrthei. Ka ai jait kmie bad ka ai jait kpa kim da ïapher ei ei ha khmat u Blei. Ka ai jait ha u shynrang ruh ka bha ka ai jait ha ka kynthei ruh ka bha.
C. B. Iawphniaw
