Patna, ïaïong:
U Rahul Gandhi, nongïalam ka Congress ha ka Lah Sngi U Blei u la ïashim bynta lang bad ka ‘Palayan Roko, Naukri Do’ (sangeh noh ïa ka jingwan buhai shnong, ai kam ai jam) ba la sdang hapoh ka jingïalam jong u Kanhaiya Kumar nongïalam ka NSUI, ha Begusarai distrik jong ka Bihar.
La synran lang ïa u da u Kanhaiya bad kiwei kiwei ki nongïalam ba rangbah jong ka seng Congress ha kane ka jingïaid kjat jong u kaba jngai 1 km. Ki nongtrei ka Congress kiba phong ïa ki T-shirt lieh bad kiba bat ïa ki lama jong ka seng ha ki kti ki la ïalum paidbah ban pdiang sngewbha ïa u Rahul hajan ka Subhash Chowk kaba don ha Begusarai kawei na ki jaka sor.
Shisngi shwa, u Rahul u la kyrpad ïa ki samla ba kin ïashim bynta ha ka ‘Palayan Roko, Naukri Do’ yatra ban pynhap shuki ïa ka sorkar NDA.
Wat la u Rahul u la dei ban kren ha ka jingïalang ha Begusarai, hynrei u la jied ban leit phai biang sha Patna ban leit sha kawei pat ka jingialang. La buh por ba un ïashim bynta ha ka ‘Samvidhan Suraksha Sammelan’ bad hadien un sa kren ha ka jingïalang jong ki nongtrei ha Sadaquat Ashram ha ka nongbah jong ka Jylla.
Kham shwa, u nongïalam ka Congress, u Shakeel Ahmad Khan u la ong ba u Rahul Gandhi u wan sha Bihar ban pyndep ïa ka jingkular jong u halor ka jingïatylli ha ka imlang-sahlang bad ka jingbishar hok ha ka imlang-sahlang.”Ki briew ki sngewkmen. U Rahul Gandhi u la leit ban jngoh khah khah ïa ka jylla na ka bynta ban leit pynurlong ïa ki jingkular ha kaba ïadei bad ka jingïatylli bad ka jingpynïoh ïa ka hok jong u paidbah,” u la bynrap.
Shuh shuh u la kyrpad ïa ki briew ba kin weng noh ïa ka sorkar NDA kaba ‘matlah’ bad kaba ‘sngap’ ha ka ilekshon dorbar thawaiñ ka ban wan ha Bihar ha u bnai Risaw-Naiwieng. Kham hashwa ha katei ka sngi, u Gandhi u la poi ha Begusarai na Patna, ha kaba la pdiang sngewbha ïa u ha Jay Prakash Narayan International Airport da u Rajesh Kumar bad kiwei pat ki heh nongïalam jong ka seng.
Kane ka dei ka sien kaba lai jong u Rahul sha ka jylla kaba la khang ban pynlong ïa ka jingthep vote naduh u bnai Kyllalyngkot mynta u snem. Ka Begusarai ka dei ka distrik trai ri jong ka Kanhaiya, kaba lah ban ïakhun na kawei na ki shuki dorbar thawaiñ jong ka Begusarai distrik ha ka ilekshon sha ka ïingdorbar thawaiñ ka jylla ka ban long ha u bnai Risaw-Naiwieng mynta u snem.
Ha ka khubor kaba la wan lyngba ka durkhih kaba shi minit kaba u la thep ha ka rynsan ‘X’, u Rahul u la kyrpad ïa ki samla ba kin ïashim bynta ha ka ‘Palayan Roko, Naukri Do’ yatra ha Begusarai ha ka lah sngi U Blei. U la kyntu ïa ki nongïashim bynta ba kin ïashim bynta ha ka Yatra da kaba phong da ka T-shirt rong lieh.
“Ko ki paralok samla jong ka Bihar, nga wan sha Begusarai ha ka 7 tarik, Ïaïong ban ïasnoh-kti lang bad phi ha ka jingïaid paidbah ‘palayan roko, naukri do’,” ong une u nongïalam ka Congress bad bynrap ba u kwah ban pyni sha ka pyrthei ïa ka jingeh jong ki samla Bihar kiba hap ban leit buhai shnong sha kiwei pat ki jylla ban wad kam wad jam.”
“Phi ruh phi wan da kaba phong da ka T-shirt lieh, kylli jingkylli bad pynsawa ïa ka sur jong phi ban buh jingeh ïa ka sorkar na ka bynta ka hok jong phi bad ban weng noh ïa ka (na ka bor),” la ong u Rahul bad phah khubor na ka bynta ban ïasnohktilang ha ka White T-Shirt Movement.
U la kyrpad ruh ïa ki samla ban pynlong ïa ka Bihar kum ka jylla kaba don ki lad ki lynti.
Ka Congress ka la sdang ïa ka jingïaid paidbah ‘Palayan Roko, Naukri Do’ na ka Bhitiharwa Ashram jong u Mahatma Gandhi kaba don ha West Champaran district ha ka 16 tarik u Lber ban pynpaw pyrthei ïa ka jingwan buhai shnong bad ka jingbym don kam don jam ha kane ka jylla. Da kaba pynkhih ïa u Kanhaiya sha ka saiñ hima sima jong ka Bihar, ka Congress ka pyrshang ban mih noh na ka jingdum jong u paralok jong ka-ka RJD-ba la ïalam da u Lalu Prasad.
Ka Congress, ha ka jingshisha, ka pyrshang ban poi sha ki EBC, ki Dalit bad ki Muslim lyngba ka ‘Samvidhan Suraksha Sammelan’. Hynrei ka jingthmu ba kongsan jong ka ka long halor ki EBC. Ki EBC ki don haduh 36.1 percent na ka jingbun briew jong ka jylla. La ïathuh ba ka Congress ka la rai ban kyntiew shuh shuh ïa ki nongïalam na ka EBC hapoh ka seng.
Dang shen, ka seng kaba la rim bha ka la pynthymmai ïa ki unit distrik jong ka shwa ka ilekshon sha ka ïingdorbar thawai. “Ïa ka jingjied ïa ki khlieh nongsynshar ba ymmai la leh da kaba buh ha ka jingmut ïa ka jingïatylli jaitbynriew,” ong uwei u heh nongïalam jong ka Congress.
