Jowai, Ïaïong 08
Ka West Jaiñtia District Badminton Association (WJDBA) ka la sdang ïa ka lympung ïalehkai ba tip kum ka 18th Inter School Badminton Championship 2025 ha ka sngi Ba-ar ha Kiang Nangbah Indoor Hall Stadium, Jowai.
Kane ka lympung ïalehkai ka ban neh saw sngi lynter la wan shim bynta haduh 143 ngut ki khynnah skul shynrang bad kynthei na 13 tylli ki skul ba don ha Jowai, Shangpung bad ki skul marjan bad ka sor Jowai. Ki la don 115 tylli ki jingïakhun na ka bynta ka kyrdan Under-13, 15, bad 17 Singles bad Doubles.
Ïa kane ka lympung la plie da u President ka West Jaiñtia District Badminton Association u Bah D. Pyrbot ha ka jingdonlang u General Secretary u Bah R. Passah nalor kiwei kiwei ki dkhot nongkitkam bad ïa ka jingïalang la pynïaid da u A. Gatphoh, Chairman jong ka Tournament Committee.
