U Nongsaiñ Hima 1969
Kane ka kyntien ‘Imlang Sahlang’ kam mut ba baroh ngi dei ban shet ja da u khiew uba heh ne ban ïa bam lang ïa kata ka ja kaba la shet ne kam mut ba ngi dei ban shna ka ïing kaba heh bad baroh ngin ïa sah lang hangta. Kaba ïadei eh ha ka ktien phareng ïa ka jingmut jong katei ka kyntien ka la long ka ktien ‘Social.’ U briew u dei u kynja jingthaw uba ym lah ban im tang marwei, u donkam ki lok ki jor, ki kha ki man etc. Lada don uba sngewbha ban im tang marwei la dei ban pyrkhat ba uta u dei ban long u jynthaw uba pher bad bym ïadei satia bad ka pyrthei ki briew.
Namar ba u briew u dei u jynthaw uba dei ban ïa im bad kiwei ki para briew, donkam ka akor, donkam ka jingpynïaid beit ia ka jingïadei para briew khnang ba kan ym don kano kano ka jingthut ne kano kano ka jingpyndkoh ïa ka jingiaim kaba ïadei para briew. Katno kan long ka jingkordit ka jingim ha sla pyrthei lada baroh baroh ngim kheiñ kor ïa ka jingïadei para briew ha ka ïaid ka ïeng ne ha ka shong ka sah. Kane kan ïalam sha ki jingkynrum kynram kiba khraw bad khlem pep yn ym don jingsuk ha pyrthei.
Peit ki Khlur, ki Met Bneng ha bneng, peit ka Sngi, peit u Bnai kumno ki ïaid la ka lynti bad kim ju ïatyngkhuh ne ïaid bakla la ka lynti. Ka long kaba jem ban sngewthuh ba kan jia aiu ïa ngi lada kine baroh ki ïaid mon ïaid laitluid bad khlem kheiñ ïano ïano. Khlem pep kan don ka jingduh thiaw ïa ka pyrthei baroh kawei.
La ju bna nam ïa ka Akor Khasi ha ka ïaid ka ïeng, ka shong ka sah ne ha ka kren ka khana ne ha ka bam ka dih ne ha ka leh sngewbha leh sngewmiat. Hynrei katba dang ïaid ki sngi ki snem nang ïohi ba kane ka dang duna shibun eh bad mih ki lad sniew kiba u Khun Khasi Khara u la thap brai pynban.
Don kiei kiei kiba ktah ïa ka Imlang Sahlang. Dei kine ruh kiba ktah ïa ka jingroi jingsan ka jaidbynriew. Peit ïa ka ïakhalai, hato kam long kaei kaei kaba sniew, kaba tam kaba ring ïa ki jingïaid jingroi ka Ri ban kiew shaphrang ? Don ki briew kiba im ha ka ïakhalai bad ym tang ba ki pynjot ïa la ka ïing ka sem, ki long ruh ki nuksa ba paw tyng-kreiñ kiba pynjot ïa la ki khun ki pyrsa.
Ka Kiad lada ym sumar bha hato kam long kaba pynrit pynraid bad ka daw kaba kongsan ïa ka jingpra ki ïing ki sem bad ka jingpynswai pynrit ïa ka jingïaid shaphrang ka jaidbynriew ? Peit ruh ia ka jingpyrshang ki Bor ban pynduna ïa ka jingbun jong ki khun ki kti. Hato kane kam long kaba pynshlur pynban ïa ka jingsniew ha ki samla bad ha kito kiba kwah ïa ka jingbrai thala ka doh ? Ka Ri France ka la long ka ri kaba khraw bad donbor shibun eh ha ki por mynshuwa. Namar ba ka la pyrshang ban pynduna briew, ka Ri France ka la hiar bha ha ka jinglong jingim bad ka ktah shibun ïa ka Imlang Sahlang bad kane ka la ktah ïa ka jingkhlaiñ ka Ri haduh ba la kylla long kaba duna bor shibun wat haduh kine ki sngi.
Don ki Ri kiba la dei ban khang ne pynïaid ryntih ïa ka Imlang Sahlang da ka Aiñ bad la dei ban leh kumne namar don ki briew kiba ym kheiñ kor ïa ka jingsngew ne jingbit jong kiwei.
