Agartala, ïaïong:
Ka jingpynkheiñ kaba khraw ïa ki kyndon ba ïadei bad ki lad ïada ri ka la paw hadien ba hynñiew ngut ki nong Bangladesh ki la shah kem hynnin ka miet halor ka jingwan rung tuh sha India da kaba ïaid lait ïa ka jingker ha ka thaiñ Amjad Nagar hajan ka Belonia.
Kane ka jingjia kaba shyrkhei ka la buh ïa ka jingartatien kaba khraw halor ka jingpeitngor jong ki bor pahara khappud, namar ka jingkyntur beaiñ ka la jia watla ki don lai tylli ki Border Out Post (BOP) kiba treikam ha Amjad Nagar, Sarasima bad Belonia ha South Tripura District.
Kum ka jingpyntreikam hadien ba la ïoh ïa ka jingtip kaba bniah, ka kynhun ba la ïalam da u IPS officer Hrishabh, Sub-Divisional Police Officer of Belonia bad u Officer-in-Charge jong ka Belonia Police Station u Shibu Ranjan Dey kiba la bat ïa kawei ka kali Maruti Ecco kaba lieh kaba don ïa u number TR08A-4224 ha Manur-mukh Taw Chowmuhani Naka Check Point. Ha kane ka jingwad bniah ki pulit ki la lap ïa ki hynñiew ngut ki nong Bangladesh kiba wan rung beaiñ sha India. La kem ruh ïa u nongñiah kali u Raju Biswas.
“Baroh kitei ki la kam ha ka jingtohkit ba ki dei ki nongshong shnong ka Bangladesh, ki la ïathuh ba ki la ïaid lait ïa u pud u sam ha ka por kumba 7 baje janmiet ha ka sngi Saitjaiñ ba la lah lyngba ka Amjad Nagar da ka jingïarap jong u Agent ka India uba la shim pisa ban pynbeit ïa ka leit ka wan bad ka jaka sah jong ki”, la ong u OC Shibu Ranjan Dey. “Ngi la ïoh kurup hynñiew tylli ki Android Mobile, kawei ka Keypad phone, ka pisa India kaba T.1,64,780 bad ka pisa Bangladesh kaba long 1,01,935 taka na ki”, u la bynrap.
Kitei ki hynñiew ngut kiba wan rung tuh ki dei kiba la tip kyrteng kum Robin Hossain (29), Mohammad Rafi (25), Amjad Hossain (27), Shahidur Jjaman (28), Fazal (24), Rehan Mollah (21), bad u Gias Uddin (35).
Ïa ka jingmudui la buh pyrshah ïa ki hapoh ki kyndon 61(2)/143(3) bad IPP Act jong ka Indian Penal Code (Case No. Belonia PS-27/25). Kine ki al shah ïalam ha khmat ka Belonia Court bad ki la shah hukum ba kin shah set patok da kumba san sngi na ka bynta ka jingshah tohkit ha ki pulit.
Ka CJM Belonia Court ka la ai 12 sngi na ka bynta ka jingset patok ïa kine kiba la shahkem. Ka tarik kaba bud ban bishar kan long ha ka 24 tarik, Ïaïong, 2025.
“Kane kam dei ka jingjia kaba jia tang mynta. Ka jingrung tuh bad ka jingkhaïi tuh ka dang ïai bteng lyngba ki jaka bapher bapher, kynthup ïa ka Motai, Hrishyamukh, Rajnagar, Rangamura bad Radha-nagar,” ong uwei u nongshong shnong ka thaiñ haba pynpaw ïa ka jing-sngewkhia halor ka jingma kaba nang jur ha kaba ïadei bad ka jingshngaiñ bad ki lad ïada ri.
