Raphael Warjri
Ka nongkylliang ka ba dei ka ju urlong ha ka pyrthei ha ba mano mano ki leh sa ïa ka bor jong ka mariang. Ka mariang barabor ka dei ka nonghikai kaba stad palat liam lada ki bynriew ki nang ban pule bad ïa khana bad kino kino ki snap ka mariang. Ka lah ban long ha ka hawhaw, katkum ka aïomshen aïomjlan, ka lang ban long bad ki jynthung jyntep, ka lah ban long bad ki khñiang ki ksiah, ka lah ban long bad ki mrad ki mreng bad kumta ter ter. Wat ki lyngwiar baheh kum ka khlaw, ne ka madiah, ka wah, u lum ki lah ban ïa khana bad ki bynriew lada ki nang. Dei na kata ka daw ba la ju ïathuh ki longshwa manshwa shaphang ki ryngkew ki basa, ki blei ki dken lane wat ki ksuid ki khrei ruh. Ka panh ka kyrpad ka nguh ka dem ka dei ka jingïashem hi jong ki bynriew bad kita ki snap ka mariang. Ka nia ka jutang ka dei ban long kaba dei ban kren hok naduh dohnud khlem artatien bad da kaba sngewskhem ryngkat ka jingsngewthuh kaba paka bad pura. Ha ba sngur ka mynsiem katta ka dang suk ïa ki bynriew ban ïa khana bad kino kino ki snap ka mariang. Na kata ka daw ha ka rukom Khasi la ju ong barabor ba lyngba ki khyllung khynnah ki long kiba bit bha ban wad ïa ki daw jong kano kano ka kam da ki nongpeit nongkhan kiba sumar ne pynkoit ïa kiba pang ba ñiuñ, lane wat ïa kaba shu wad ïa ka jingshisha halor kaei kaei kaba sah umdum. Ki lah ban don kiwei pat ki briew kiba lah ban kynthoh ba ka dei tang ka jingngeit bieit lane ba ka shu jia ryngkhat ne kam shym iktah eiei kata ka ïa kren ïa khana bad ki snap ka mariang.
Wat ka stadtip stadmaïan ka juk mynta ruh la kubur ba kino kino ki snap ka ma-riang ki don ïa kata ka bor ba lah ban ïa khana bad ki bynriew lada ki skhem jingmut bad ka bor barieh ka don ha man la ki jynthaw. La ju shem ba kito kiba ieit mrad ki lah ban ïa khana khlem ka ktien ba sngewthuh lang hynrei tang da ka durkhmat bad ka khih met khih phad. Ki don byllai ki briew kiba sngewthuh ban ïa khana khlem kren da ka ktien lane lada kren ruh bad ki miaw ki ksew, ki sim ki doh, khamtam ha nongkyndong. Ki don ki mrad kum ki ksew ki miaw ki sim ki doh kiba lah ban sngewthuh ïa ki jingkren jong ki kynrad jong ki ha la ka lyngwiar jong ka rympei longïing longsem. Ki briew ba ju ri sumar ïa ki miaw ki ksew ki sim ki doh lane wat ïa ki blang ki masi ne ki kulai ki muid ki nang ban ïa khana bad la ki jingri lajong ha kano-kano ka khep ba donkam bad ki ïa sngewthuh markylliang. U kynja ksew lei lei u don ka sap kyrpang ban sma dien ïa kano kano ka jingma kaba lah ban jia ïa la ki kynrad lajong kiba ri bad dup ïa ki. Lehse ka la dei naduh kata ka khep jong ka khanatang shaphang ka ïew luri lura ba ka la don ka jingïateh hapdeng ki bynriew bad ki ksew. Kane ka khana shaphang ka ïew luri lura ki laiphew jynthaw ka la shon shab ïa ka jingshisha ha ka pyrthei ba dei tang ki kynja ksew kiba don la ka sap ka ba pher ban smadien ïa kino kino ki para jynthaw. Ki dang don sa kiwei kiwei ki bynta kiba la urlong shisha lyng-ba ki khanatang tang yn jer tang ïa kito kiba idei ban pynskhem ka jingsngewthuh ïa ka jingshisha kumba la pahalang na ki khanatang Khasi. Ha kaba ïa dei bad ki ksew ka don sa kawei ka bynta ka ba shynna ha pyrthei ba la don ha ki khanatang Khasi naduh kulong kumah.
ïa kito ki khana ba la ju ïa tip paidbah te ym da donkam than ban ïathuh biang, hynrei yn jer tang ïa kito ki khana kiba ym pat da ïa tip paidbah hynrei kiba don ka jingshisha kaba shon jingmut ha ka imlang sahlang bad kiba lah urlong naduh mynnor kaba la ïa tip paidbah salonsar shityllup ka pyrthei. Ka don kawei ka khanatang Khasi ba la shem na ka kot ba thoh I Bah B V Rymmai kaba ïathuh ba ha ka khep ba ki bynriew ki dei ban leit sha ka Dorbar Blei na ka bynta ban leit shim ïa ki sap ki phong ban sam U Blei ha ki bynriew, hynrei u bynriew u la leh syntan na ka daw ba la phyrngop noh ha ka jyrsieh shongkha shongman parabriew bad khlem lah poi shuh sha ka Dorbar Blei. Ka nong kaba ki la ioh na kata ka jingleh syntan bad ba ym suitñiew ïa ki hukum Blei, ka la jia ba ki briew ki la ïa sahkut ki mynraiñ kynthei shynrang khlem lah ïa lait shuh. Ha kata ka jynjar ka syrtok jong ki bynriew, la leit bah khala ki ksew ban pyllait noh ïa ki bynriew na kata ka kam khlemrai ba thadrong. Naduh kata ka por ki bynriew kim ju lei lei shuh namar ba lah bah khala ki ksew naduh kata ka khep, bad haduh mynta mynne dei tang ki ksew napdeng baroh ki para jynthaw kiba sahkut ki mynraiñ kynthei shynrang ha ka por ba shongkha shongman. Kane ka long ka jingshisha ba ym lah len bad kaba long salonsar ha shityllup ka pyrthei. Kata ka la kylla long ka aiñ jong ka mariang ba kano kano ka bor briew ne bor jynthaw ka ba lah ban kylla pat.
