M.M.Thaiang
Haba U Jisu u mih na ka shnong Bethania sha Jerusalem ki paidbah ha kata ka por ki da ïa risa kmen bad pdiang ïa U kum U Syiem, U Kynrad jong ki bad ïa risa ïaroh ïa U kum U Mesaaia lane kum Uta uba ki la khmih lynti ban wan ban pynim ïa ki. Ha kane ka sngi ba u Jisu, u wan rung ha Nongbah Jerusalem, ki paidbah ki la dap da ka jing-kmen da kaba rwai ïaroh “Hosana-Hosana”, hynrei pat tang hadien saw sngi, ki juh ki paidbah na ka “Hosana-Hosana” ka kylla pat “Sahnarphna-Sahnarphna” kumno kane ka lah ban long ba kine ki juh ki paidbah ki kylla ktien? Ki paidbah Jiw ki dei ban kylla ktien, khnang ban urlong ïa kaba U Jisu u la pynbna ktien ha ki Synran jong u kham mynshwa ba un sa shah shitom bad ban shah pynïap, khnang ban pynim ym tang ïa ki, hynrei ïa u khun bynriew shi khrum ka bneng shi tyllup ka pyrthei.
U Isaiah uwei na ki nongïathuhlypa uba khraw shwa ka jingkha ïa U Jisu Khrist sha kane ka pyrthei, haba u ïathuhlypa ïa kiei kiei ki ban sajia shaphang U Jisu u ong “La pynmong ïa U, namar ka jingleh bymhok jong ngi, la shoh la sympat, la pynmong pynmynsaw ïa ka met jong U, namar ki pop jong ngi, ka jingshah sympat halor ka met jong u na ka bynta ka jingpynïasuk ïa ngi, da ka jingmong jong U la pynkoit ïa ngi da ka jingïap jong u, u la pymim ïa ngi”.
U Khrist u dei ban ïap bad haba la mon da U Blei Nongbuh Nongthaw ba u Jisu Khrist U Khun ba marwei jong U (Blei) ba u dei ban ïap ban pynim ïa U khun bynriew shi khrum ka bneng shi tyllup ka pyrthei, ym don bor pyrthei kaba lah ban khang ïa U Jisu na ka jingshah pynïap.
U Pontius Pilatus, u briew uba don ka bor bad ka iktiar ( ha ka por jong U Jisu) ban pyllait im ïano-ïano lane ban phah pynïap. Hadien ba u la tohkit sani bha shaphang ka jingim jong u Jisu, um shem daw eiei ba U Jisu un shah pynshitom bad ban sahnarphna haduh ban da ïap thadrong halor ka Diengphna ha Lum Kalbari, pynban haba la mang da U Blei ba U Jisu u dei ban ïap na ka bynta u khun bynriew, ym shem la pyllait im ïa U Jisu wat lada u don ka bor bad ka Iktiar ban pyllait im ïa U Jisu bad um shem la pyllait im ïa u ( u Jisu na ka jingshah pyniap bad sdien halor ka Diengphna. U Pilatus ha ka jaka ban pyllait im ïa u Jisu, u thet-kti pynban ba um don bynta eiei ha kaba pynshitom beiñ bad pynïap ïa U Jisu da ka jingïap thadrong halor ka Diengphna. Balei ba u Pontius Pilatus um shem la pyndonkam ïa la ka bor ban pyllait im ïa U Jisu haba u shem ba U Jisu U long u briew u babha, u bym don jingthohbria ei ei ha ka jingim jong U lane haba um shem daw ei ei ba U Jisu u dei ban shah pynïap. ïa ka jingshah pynshitom beiñ bad shah pynïap U Jisu, ki briew kim sngew phylla ei ei naba ki jingthoh ha ka Bible ki kren shai ba U Jisu U dei ban shah shitom bad shah pynïap na ka bynta ka jingpynïasuk ïa u briew bad U Blei.
Haba shim na ka jingphla u rangbah shispah bad kito kiba la don lang bad U ha Lum Kalbari, ki phla ba U Jisu u long da shisha U khun jong U Blei bad uba long hi ruh U Blei uba don ka bor bad ka Iktiar. U Jisu, u la pynkoit ïa kiba pang, u la pynïohi pat ïa kiba matlah, u la pynïaid beit ïa kiba dkoh, u la pymim ïa kiba ïap, u la pynroi ïa ki san tylli ki kpu suwa, ïa ar tylli ki ktunglaniap haduh ba la dap bam palat san hajar ngut ki briew, u la beh ïa ki ksuid ki khrei kiba long ka tyllongbah jong ki jingsniew baroh bad uba la jop thiaw ïa ka jingïap da ka jingmihpat jong u na kaba iap
U Jisu u don kat kane ka bor bad ka iktiar lada u kwah ban lait na ka jingshah pynshitom beiñ bad na ka jingshah pynïap ha ki briew, u lah ban pynlait im ïalde da kaba jem eh, pynban um shem la pynibor eiei naba la thoh ba U Jisu Khrist u dei ban iap kum u ‘Langsaitpap na ka bynta u khun bynriew. Nang pynskhem shuh shuh ïa kane ka jingong ba U Jisu Khrist u dei ban iap da U Ioannis Baptist kaba ong “ha khmih U Khun langbrot jong U Blei u ba wan ban kitnoh ïa ki pap, ki sang jong ka pyrthei” U Langsait pap um lah ban sait pop ïa u khun bynriew lymda un shah kñia bad shah pyniap.
U Lukas, uwei na ki nongthoh ïa ka Khubor babha U Jisu Khrist ha ka jingthoh jong u, u la thoh ïa kine ki kyntien “U Khun u briew un iap kumba la rai U Blei”,U Ioannis, u synran uba U Jisu u ieit eh, uba la ïadon bad U Jisu, uba la shaniah ha ka shadem jong U Jisu Khrist ha ka miet jingkhawai miet kaba khatduh, uba la don ha kjat jong ka Diengphna ha ka sngi ba shah pynïap U Jisu, u kdew ïa kine ki kyntien “Ka jingieit ba khraw tam ba u briew u lah ban don na ka bynta ki lok jong u, ka long ban aiti la ka jingim na ka bynta jongki”.
Shuh shuh u Lukas ha ka jingthoh jong u, u ong, U Jisu bad uwei pat u briew kiba dangleit jingleit na Jerusalem sha Emmause, ha lynti ki la ïakren para maki shaphang bun kiei kiei kiba la jia ha Jerusalem, Une u briew uba ïa ïaid lang bad ki haba u ïohsngew ba kine ki ar ngut ki synran jong U Jisu ki la ïa kren ïa ka jingjia ïa U Jisu ba u la shah pyniap da ka jingiap sdien halor ka Diengphna, u la kylli ïa kita ki synran”Hato kam shym la dei ïa U Jisu u Messaia ba un shah ïa kita kiei kiei bad kumta un rung sha ka burom? Shuh shuh U Lukas, ha ka jingthoh jong u, u kdew ïa kine ki kyntien “Ka jingshah Lehbeiñ, ka jingpynïap U Jisu ka long ka dak ba U Blei lyngba u khun jong u, u Jisu, u la siewspah ïa u khun- bynriew. La nang pynskhem shuh shuh ïa katai ka jingong kaba la kdew ha neng da ki kyntien jong U Petrus ( Petros) uwei na ki synran ba radbah tam U Jisu kaba ong “U Jisu u la siew-spah ïa u khun bynriew, um da ka ksiar, ka rupa ne da ki mar ki mata ki bym don dor eiei, hynrei da ka snam (U Jisu Khrist) da ka jingiap jong u Jisu Khrist.
Haba pynlum lang na ki jingthoh Baible kiba kren shaphang ka jingim jong u Jisu Khrist ha kata ka sngi “Good Friday” kaba nyngkong ki briew kim sngew phylla eiei naba ka jingthoh ka kdew ba U Jisu Khrist u dei ban shah pynïap ban siew-spah ïa u khun bynriew bad ban mih pat na ka jingïap. Ka jingïap bad ka jingjop U Jisu Khrist ïa ka jingïap, ka long ka jingjop ym tang ban pynpulom ïa ka pap, ka sang, ka long ruh ka jingjop ïa u ksuid u khrei uba long ka tynrai bad ka tyllong bah jong ki jingsniew baroh bad ka jingpynim ïa kito kiba ngeit ha u.
