Shillong, Naitung 06
U AT Mondal uba dei Myntri ka tnat Bording jong ka Jylla, u la buh ka jingkyrpad ban pyllait noh mardor ïa ka Power System Development Fund (PSDF) ha ka jingïalang kaba 16 jong ka National Power Com-mittee (NPC) kaba la long ha Shillong ha ka Sngi Thohdieng mynshem taïew.
U Mondal uba bat ruh kum Chairperson jong ka North Eastern Regional Power Committee (NER-PC), u la pynpaw ba wat hapdeng ka jingmynjur ban pynpoi ïa ki laiñ bording sha ka thaiñ shatei lam-mihngi, hynrei ka PSDF ka dang pynsahteng ïa ka pisa bad kane ka dei ka daw kaba slem ka jingkyntiew kyrdan ha baroh kawei ka thaiñ.
“Ka ‘Transmission System Requirement jong ki jylla NER & Sikkim haduh u snem 2031-32’ la dep ban mynjur da ka Central Electricity Authority (CEA), hynrei ka pisa pat ka dang sahteng,” ong u Mondal bad bynrap ruh da kaba kyntu ïa ki nongïalam ka NPC bad CEA ban pynsted ïa ka kam.
Haba batai bniah ïa ka jingkiew jong ka jylla Meghalaya ha kine ki khyndiat snem, u Mondal u la ong ba ka jylla ka la bynrap biang sa 434 kilometres ka circuit jong u 220kV bad 132kV transmission line bad la kyntiew ïa ka bor pynmih bording da 1,130 MVA ha kine san snem ba la leit. Ka project ka ban sa wan la khmih lynti bad bynrap ne pyndap sha ka 1,090 circuit kilometres bad 760 MVA, bad ka jingdonkam pisa ka long haduh 2,270 klur.
Shuh shuh u Mondal u la khot ruh ban buh ïa ka substation ba 132/33 kV ha Baghmara, kaba dei ka thaiñ khappud ban kyntiew ïa ka jingsam bording ha ki jaka thaiñ nongkyndong bad kiba jngai jong ka thaiñ.
Ha ka jingïalang jong ka NPC la wan ban ïashim bynta haduh 33 ngut ki nongmihkhmat bad ki heh ophisar, kynthup ïa u Chairperson ka CEA u Ghanshyam Prasad bad la pdiang ruh ïa ki katto-katne ki mat ba kongsan.
