Shillong, Naitung 06
Kawei ka kali kaba la pynher sted bad ñiah da u nongñiah uba la shoh khawiang ka la leit ban tynrah beit-beit ïa kawei ka kali Scorpio jong u MLA ka 17-North Shil-long Konstitwensi, Bah Adelbert Nongrum bad kumjuh ban leit tynrah pat ïa kawei ka kali Maruti.
Kane ka dei kaba la jia ha ka janmiet jong ka Sngi U Blei ka 06 tarik u Naitung 2025, ha Lad Nehru Park ha ka por kumba 7 baje eiei, katba ka kali jong u MLA ka dang thmu ban leit sha Umsning.
Katei ka kali kaba leit ban tynrah ka dei ka Maruti Espresso kaba don ïa u registration number ML 05 AB 8537, namar ha kaba nyngkong ka la leit ban tynrah ïa kawei ka kali Maruti shimet kaba don ïa u registration number ML 05 C 6579 bad hadien pat sa ïa ka kali jong u Bah Adelbert Nongrum.
Ha ka jingïakren bad U Nongsaiñ Hima ha ka janmiet Sngi U Blei lyngba ka phone, u Bah Adelbert Nongrum u la ïathuh ba ka daw ka jingjia aksiden ka dei namar ba u nongñiah jong katei ka Maruti Espresso u la shoh khawiang bad u la pynher sted palat.
U la ïathuh ba nyngkong katei ka kali ka la wan ban tynrah beit-beit shwa ïa kawei ka kali Maruti kaba don hakhmat bad hadien kata ka wan ban tynrah sa ïa ka kali jong u. Ha kane ka jingjia ym don mano-mano ruh ki ban mynsaw hynrei ka la don tang ka jingjulor jong kitei lai tylli ki kali.
Shuh shuh u la ïathuh ruh ba u nongñiah ka Maruti Espresso ka dei namar ba u la shongshit palat bad u la tam shakhmat lut ïa baroh ki kali ba ha khmat bad mar shu poi ha katei ka jaka ka la wan ban tynrah ïa ka kali jong u bad ïa ka Maruti.
“Hapoh ka kali jong u la ïadonlang ka kurim, ka kiaw bad ki khun hynrei da ka jingïada U Blei najrong baroh ki la lait na ka jingmynsaw, katba hapoh katei ka kali Maruti Espresso ki don haduh 4 ne 5 ngut kiba la ïa buaid,” la ong u Bah Adelbert.
Na ka liang ki pulit jong ka Thanat Umïam mar ïa bna ïa kane ka jingjia ki la wan poi mar-mar bad ki la ïalam noh ïa baroh ban phah leh ïa ka Medical Check-Up bad ban pynlong ruh ïa ka jingtohkit kaba bniah halor katei ka jingjia.
