Shillong, Naitung 06
U Bah OL Tariang uba dei Chairman ka Jaiñtia Joint Action (JJA) u la pynpaw ba u kwah ba ki pulit ka Meghalaya ki dei ban ap pahara ha khappud ha Lapangap kumba ap pahara ki pulit Assam.
Haba ïakren bad u Bah OL Tariang lyngba ka phone, u la ïathuh ba ka Jaiñtia Joint Action kaba kynthup ïa ka Jaiñtia Youth Federation bad War Jaiñtia Students Union kin sa ïakynduh biang ha ka 8 tarik mynta u bnai ha Jowai ban buddien ïa ka jingmih ka jingïakajia ha Lapangap bad ki Karbi.
U la ïathuh ba ka jinglong-jingman ha khappud ha Lapangap ka la jai-jai hynrei u kwah ba ki pulit Meghalaya kim dei ban shong ha shnong Lapangap hynrei kin ap pahara ha khappud kumba leh ki pulit Assam, kiba ap pahara ha khappud ym ban shong ha shnong briew. Shuh shuh u la pyntip ba ka JJA kan sa shong jingïa-lang bad ka HBDRF kaba ju peit tang ïa ka jingïakajia pud ha khappud.
U la ïathuh ba ha kane ka 8 tarik Naitung kan sa shim ki rai na ka bynta ban pynsngew sha ka Sorkar.
Kum ban shu pynkynmaw, ki paidbah ka shnong Lapangap ha ka jingsynran lang ki dkhot ka KSU bad ka FKJGP ki la leit ban pynpra bad jynrat ïa ki jingtei ba la shna da ki Karbi ha ka jaka jong ka shnong Lapangap kaba la jia ha ka 25 tarik Jylliew 2025.
