Shillong, Naitung 06
Ka projek ba la bei tyngka da ka NEC na bynta ban tei ïa ki ‘Hostel Block’ jong ki shynrang bad kynthei ha Capt. Williamson Sangma Me-morial College, Baghma-ra, South Garo Hills la lah ban pyndep ha ka 16 tarik Jylliew mynta u snem.
Ïa kane ka projek kaba la mang ha u bnai Jylliew jong u snem 2021 ha ka jinglut baroh kaba kot T.1.6666 klur, la ïaid shakhmat ha ryngkat ka jingthmu ban pynbha ïa ka lad khnang ban pynïoh ïa ka jingpule ba kham shajrong na bynta ki samla pule na ki jaka ba jngai jong ka distrik.
Kumba ka long, kine ki ‘Hostel’ ba la shna thymmai ki long ban pdiang ïa ki samla pule kiba wan na ki longïing ba duna ka ïoh ka kot, da kaba weng noh ïa ka jingkhanglad ban bteng ïa ka jingpule ba kham shajrong.
Kane ka sienjam ka kdew ïa ka jingïai bteng ba aiti lut jong ka NEC ban pynbha ïa ki jingtei ha ka liang ka pule-puthi bad ban kyntiew ïa ka jinglah ban ïohpdiang ïa ka jingpule kaba paka bad ka bym noh shiliang, khamtam eh na bynta kito ki jaidbynriew kiba ïoh ïa ka jingshakri kaba duna bad kiba mad jingeh hapoh ka Jylla.
Ha kawei ka liang, ïa ka projek ba la bei tyngka da ka NEC na bynta ban kyntiew kyrdan ïa ki skul ba la jied ka Ramakrishna Mission (RKM) kiba don ha East Khasi Hills (Mawsynram/Shella-Bholaganj) bad South West Khasi Hills (Ranikor), la lah pyndep noh ha ka 24 tarik u Jylliew, 2025.
Kane ka projek kaba la mang ha ka 22 tarik u Nohprah, 2020, ha ka jinglut kaba la antad haduh T.4.2997 klur, ka thmu ban ai ïa ka pule-puthi kaba lah ban ïohpdiang, ka bym rem dor bad kaba paka sha ki khynnah na ki longïing jong ki nongtrei ‘marginal worker’ ha ki jaka ba jngai bad duna ka jingshakri.
Ha kajuh ka por, ka pynleit jingmut ha ka ban pynkhlaiñ ïa ki jingtei jong ki skul bad ban shimkhia halor ka jingdon jong bun ngut ki khynnah ba pep skul shiteng por bad ka jingduna ha ka jinglah ban ïohpdang ïa ka jingpule ‘Higher Secondary’ (non-commercial) ha kine ki Block nongkyndong.
Shuh shuh da ka jingpyndep ïa kane ka projek, la khmih lynti ba ka jingpynrung kyrteng ïa baroh ki samla pule kan kiew kumba 45.2%, ka ban ai lad ïa kumba 523 ngut ki samla pule na ki longïing kiba don hapoh u laiñ jong ka jingduk (BPL) ban ïohpdiang ïa ka jingpule ba kham shajrong man u snem.
Kane ka jingthmu ka pyni ïa ka sienjam kaba kongsan ban kyntiew ïa ka jingnang-jingstad bad ki lad na bynta ka pule-puthi hapoh ka thaiñ.
