Shillong, Naitung 06
Ka National People’s Party (NPP) Farmer’s Front State Unit ha ka 03 tarik u Naitung 2025 ka pynlong ïa ka jingïalang kaba nyngkong ha Mawkynrew Konstitwensi ha Ïing Dorbar Shnong Maw-u-Sam halor kumno ban pynkhlaiñ ïa ka rep ka riang bad ban ai ka jingïarap ïa ki nongrep.
Ha kane ka jingïalang la ïoh ruh ban pyntip ïa ki kyrteng jong ki nongkitkam jong ka NPP Farmer’s Front jong ka Mawkynrew Block ha ka jingïadonlang ruh u Bah Banteidor Lyngdoh MLA ka thaiñ, u Bah Himalaya M Shangpliang kum Chairman jong ka Farmer’s Front bad ki nongkitkam jong ki district nalor ki nongkitkam jong ki block kiba hap hapoh ka East Khasi Hills District.
Haba ai jingkren na ka liang ki nongïalam ka NPP Farmer’s Front kynthup ïa u Bah HM Shangpliang bad Secretary Bah Egenstar Kurkalang, bad u MLA ka Mawkynrew Bah Banteidor, ki la ïathuh ba kane ka dawai sboh namar ba la bun ki nong Mawkynrew hi ki la ïoh license retailer ban shalan ha ki thaiñ block Mawkynrew hi baroh bad kin sa pynpoi sha ki paidbah kiba kwah ïa kine ki dawai sboh.
Haba pynpaw pat halor ka skhim CM Assure kaba dei kyrpang na ka bynta ki nongrep synsar haba hiar ka dor ha ïew, na ka liang u Chairman ka Farmer’s Front, Bah HM Shangpliang, u la ïathuh ba ha ka jingïalang ha kane ka sngi, ki nongrep ki la ud ba ka jingshim jong ka sorkar tang 800 kilo u synsar kam pat biang satia namar ki don da ki hajar kilo kiba la hap ban duh ei.
“La pyntip ba bun ki paidbah kim pat tip shaphang kane ka skim bad don ruh kiba kyrpad ba ka sorkar kan shim khambun u synsar bad ruh ban kyntiew shuh ka dor khnang ba ki nongrep kin ym duhnong,” u la ong.
U la ïathuh ba katkum ka dor synsar ba ka sorkar ka shim, ïa u Grade A ka sorkar lyngba ka skim CM Assure la thied ha ka dor 55 tyngka shi kilo, nangta ïa u Grade B ha ka dor 40 tyngka bad ïa u Grade C ha ka dor ba 30 tyngka shi kilo. Halor kane, ngi la rai ban rah sha ka sorkar ban pynsngew ïa kane ban kyrpad ban shim kham bun kilo shuh u synsar bad ruh ïa ka dor.
Ha kajuh ka por u la ïathuh ba ka la don ka jingud halor ka jingslem palat ban pynrung ne rejistar, hynrei na ka liang jong ka Front kan sa leh kham kloi noh na ka bynta ban register ïa ki Nongrep khnang ban ïoh shibun ki jingmyntoi na ka bynta ka rep ka riang haka Jylla Meghalaya.
Na ka liang u Bah Banteidor pat u la pyntip ba na ka liang ka party ryngkat ka jingïatrei lang bad ki nongrep na ka thaiñ Mawkynrew kin sa ïa kynduh biang ban pynsngew pat ïa ka jingeh ba ki nongrep na ka thaiñ ki kynduh haduh shkor jong u Myntri Rangbah ka Jylla.
Ha kane kajuh ka sngi, ka Farmers Front ka la pynskhem ruh ïa ki nongkitkam jong ki distrik na bynta ki distrik jong ka rilum Khasi ryngkat ka jingbthah pat ba kin thaw ïa ka komiti ha ki block kiban don ha man la ki konstitwensi khnang ba kin lah ban peit pat ïa ka jingeh jong ki nongrep.
