Nongstoiñ, Naitung 06
Ka ïingkashari Special Judge (POCSO), Nongstoiñ, ka la rai pynrem bad pynngat ha ki kyndon aiñ kiba tyngeh ïa ki lai ngut ki briew halor ki mukotduma bapher- bapher kiba ïadei bad ka kam thombor ïa ka longrynïeng ki khynnah kata hadien ba la dep ban tohkit bad bishar bniah.
Ha ka kyrwoh khubor, ba la phah da u Superintendent of Police ka West Khasi Hills la pynpaw ba u Sanjay Kumar Thakur u la shah pynngat bad shah rai pynrem halor ka jingthombor ïa iwei i khynnah ha ka 9/5/2022 bad ïa ka ejahar (FIR) la ïohpdiang ha ka 10 tarik Jymmang 2022, ha kaba la pynrung ïa ka mukotduma hapoh ki kyndon 7/8 jong ka POCSO Act ha thanat Nongstoiñ bad ïa ka jingtohkit la shimti da ka WPSI DP Nongbri. Kumta ka ïingkashari ha ka 30 tarik, Jylliew, 2025 ka la shim ïa ka rai ban set patok ïa u 3 snem bad un hap ban siew ruh ïa ka kuna kaba T.10,000. Lada um lah ban siew, un shah set patok biang sa 6 bnai kynthih.
Shuh shuh ka khubor na u SP ka la pynpaw ruh ba ha kawei pat ka mukotduma, u Louis Jaggu Diengngan na Riangdo u la shah pynngat kyndon halor ka jingthombor kaba la ïai jia ïa iwei i khynnah naduh ka 29/10/2021 haduh ka 31/11/2021.
La ong ruh ba ïa kane ka mukotduma la pynrung hapoh ki kyndon Section 5(1)/6 jong ka POCSO Act ha thanat Mawshynrut bad la tohkit da ka WPSI L Siangshai bad ha ka 30 tarik Jylliew, 2025, ka ïingkashari ka la rai ban set patok haduh 20 snem kynthih bad ka kuna T.25,000 hapoh ka Section 3(a)/4 jong ka POCSO Act, 3 snem ka jingshah set patok bad kuna T.10,000 hapoh ka Section 7/8 jong ka POCSO Act bad 5 snem ka jingshah set patok ryngkat ka kuna T.15,000 hapoh ka Section 363 jong ka IPC bad lada um siew ïa ki kuna, un sa shah set patok shuh sa 6 bnai.
Nangta, ka khubor ka ong ruh ba u Maximus Puwein na Maweit, u la shah rai pynrem ha ka ïingkashari halor ka jingthombor ïa iwei pat i khynnah ha ka 7/7/2022. Ka ejahar la pynrung ha ka 8 tarik Naitung, 2022 bad la tohkit da ka WPSI N Wanniang. Ha ka 23 tarik Jylliew, 2025, ka ïingkashari ka la rai ban set patok ïa u 2 snem 6 bnai bad ka kuna T.10,000 bad lada um siew ïa ka kuna, un hap shah set patok shuh sa 6 bnai.
Ïa kine lai tylli ki mukotduma la tohkit da ka Nongstoiñ Women Police Station bad la pynngat ha ka ïingkashari POCSO ha Nongstoiñ.
