Shillong, Naitung 07
Ha kawei ka jingjia kaba sngew tohmet katta-katta kaba la jia ha ka 3 tarik u Naitung, 2025, ha kaba uwei u samla ïa uba la tip kyrteng kum u Gedwin Jyrwa uba dang don 19 snem ka rta na ka shnong Mawkisyiem kaba hap hapoh Sohra, u la shah shoh bad shah bom haduh ban da mynsaw jur bha ha ki Pulit ka thanat Sohra.
Ha ka jingïoh ban ïakren bad utei u samla uba la wan bad la ka kmie ha ryngkat ka jingsynran lang da ka Hynñiewtrep National Youth Front (HNYF) sha Civil Hospital, Shillong ban ïoh ïa ka jingsumar, u la ïathuh ba ka dei ha ka Sngi Saitjaiñ jong ka 28 tarik u bnai Jylliew 2025, ha kaba ma u lem bad u paralok jong u hapdeng ka jingshoh khawiang, ka la mih ka huri-hura bad ka jingjrong kti kaba malu-mala hynrei na ka liang jong utei uwei pat u samla u la ujor noh da ka ejahar pyrshah ïa u samla Gedwin Jyrwa.
Na ka liang ka kmie jong u Gedwin Jyrwa, Kong Mildred Jyrwa ka la leit ban aiti hi noh dalade ïa la u khun ha ka 3 tarik u bnai Naitung, 2025 ha thanat Sohra khnang ba kan don noh ka jingïasuk hapdeng u khun jong ka bad uta u paralok jong u hynrei khlem ka jingmutdur pat ba ki Pulit kiba don ha katei ka sngi ha thanat, ki la set ïa utei u samla bad ban bom ban tied ïa u haduh ba un da mynsaw jur khlem kano-kano ka jingïakren bad u.
U samla Gedwin u la ïathuh ba wat hadien ba u la panmap na ki bor Pulit ruh hynrei kim map satia ïa u bad ki la ïai bteng ban bom bad tied ïa u haduh ba un da mynsaw jur bad u la ïathuh ruh ba ki don kumba 5 ngut eiei ki pulit kiba la donkti ban tied bad bom ïa u haduh ban da mynsaw da kaba kynnoh ba kitei ki Pulit kiba la bom bad tied ïa u ki don hapdeng ka jingdih-jingbam.
“Ngam sngewthuh-sngewthaw shuh ha ka por ba ki bom ïa nga hynrei nga la shu duwai Blei bad nga la panmap hynrei kim map ïanga,” ong utei u samla.
Utei u samla u la ïathuh ba hadien ba ki Pulit ki la dep ban shoh ïa u, u la pan um ban dih na ki hynrei ki la ong ïa u ban leit dih da ka um na paiñkhana bad ong ba kitei ki Pulit ki la shu tim tang da ka ktien sih suda ïa u.
“Hadien ba ki la ïalam ïa nga ban leh ïa ka Medical Check Up bad ynda ngi la poi ha thanat, ki la pynthiah bad ki la bom beit ïa nga. Nga khlem sngewthuh shuh bad nga la shu ïapler beit ïalade ha madan,” ong utei u samla.
Shuh-shuh, utei u samla u la ïathuh ba wat haba u leit ban pynjhieh ruh kam lait shuh bad u la ïathuh ruh ba u dei uba ju bylla ban pyndap ha ïing- ha sem ïa la ki para.
U Bah Tyllibor Swer, General Secretary ka HNYF Sengkmie, u la ong ba na ka liang ka ïing-ka sem jong utei u samla lem bad ka Seng ki la leit ban buh da ka jingujor hakhmat ka Meghalaya Human Rights Commission (MHRC) bad ki la leit ruh ban buh da ka ejahar ha u Superintendent of Police (SP) ka East Khasi Hills District, Bah Vivek Syiem halor kane ka bynta ha kaba na ka liang u SP u la ong ba lada kane ka jingjia ka long kaba shisha, yn sa shim da ki sienjam kiba kongsan.
U Bah Swer u la ong ba kum kine ki jingjia shah shoh jong ki khun samla ka Ri ha ki bor ka aiñ ka ju jia bha na ka por sha ka por bad ha kajuh ka por, kane ka pyni ba ka don ka jingpyndonkam bakla ïa ka bor, kumta na ka liang ka seng ka la pynrem jur halor kane ka jingleh ‘riewkhlaw ki bor pulit bad ka seng kan sa nang ïai buddien halor kane ka jingjia.
Na ka liang u Bah Banjop Khongwir, Nongaiktien ka HNYF South East Sohra Circle, u la ong ba kum ka seng ka dap da ka jingsngew bynñiaw halor kane ka jingjia da kaba ong ba kane ka jingleh ka dei ka jingpyndonkam bakla ïa ka bor da ki Pulit wat haba ka dei ka jingjia kaba rit.
