Shillong, Naitung 07
Uwei u briew hadien ba u la shah tuh ka mobile phone, u la shah byrngem kylla pynban ha u nongtuh bad uba la dawa pisa kylla.
Katkum ka khubor kaba la ïoh na ki pulit la ong ba uwei u nongshong shnong jong ka nongbah Shillong u la ai ka jingujor ba ha ka 2 tarik mynta u bnai ha ka por kumba 2 baje mynsngi, ki runar bym lah ban ithuh ki la tuh ïa ka mobile phone ka jong u na Ïewduh Shillong.
Shuh shuh la ong ba kham hadien, ynda une u rangbah u la phone sha ka mobile phone lade, uwei u runar bym ithuh uba la shim ïa ka phone, u la byrngem ïa ka khun ka jong u bad ha kajuh ka por ban dawa pisa ruh haduh T.10,000.
Ha kaba ïadei bad kane, na ka liang jong ki pulit hadien ba ki la ïoh ka jingujor, ki la pynïaid shakhmat ïa ka jingtohkit na ka bynta ban lap ïa ki jingshisha bad ban thwet ïa ki runar kiba donkti ha kane ka kam.
